Жергілікті кадрға не жетсін...

Новости

04.04.2017, 16:33

Ақтөбе көлік, коммуникация және жаңа технологиялар колледжі басшылығы өз түлектерінің жергілікті теміржол мекемелеріне жұмысқа орналасуына барынша ықпал етуге тырысады. Осы мақсатта жыл сайын теміржол мекемелерінің басшылары мен колледж түлектерінің басын қосып түрлі шаралар өткізіп келеді. Оқу орны директорының тәрбие ісі жөніндегі орынбасары Бақытгүл Әбілпейісованың айтуынша, студенттердің дені жергілікті аудан, ауылдардан келгендіктен, олардың жергілікті мекемелерден, тіпті өз аудандары мен ауылдарындағы теміржол кәсіпорындарына жұмысқа орналасса, жұмыс берушіге де, жұмыс алушыға да тиімді болмақ. –Жергілікті кадрға жететіні жоқ. Басқа жақтан келген маманның жергілікті ел мен жерге үйренісіп қалып қоюы сирек кезедседі. Сырттан келген маманның көпшілігі бірнеше жылдан соң еліне қарай жылжығысы келіп немесе сол жаққа алаңдаумен жүретіні адамға тән табиғи қасиет шығар деп ойлаймын. Сондықтан, біз жыл сайын колледж түлектерінің 70-85 пайызының жұмыспен қамтылуына күш саламыз. Басқа салаға кететіндері де болады, дегенмен, басым бөлігі өздері таңдаған мамандықтары бойынша еңбек етеді, – дейді ол. Бақытгүл Әбілпейісованың айтуынша, әрдайым санаулы жыл бұрын енгізілген білім берудің дуальды жүйесі де жемісін бере бастады. –Студенттерді өндіріске баулудың бір амалы дуальды білім жүйесі бойынша өндірістік тәжірибе сағатын арттыру. Бұрын көбінесе теорияға басымдық берілсе, бүгінде керісінше, шамамен 60 пайыз практика, 40 пайыз теория. Теміржол мекемелерінде өндірістік тәжірибеде өздерін жақсы жағынан көрсете білген студент міндетті түрде сол жерге жұмысқа шақырту алады, –дейді ол. Студенттер тәжірибеден өткенде колледж басшылығы үнемі қадағалап отырады екен. Жұмыс берушілермен кездесіп, оларды жұмысқа тартудың жолын қарастырады. Дипломдық жобаны қорғағанда бірқатар мекеме басшылары арнайы шақыртылады. Бұл да мекеме басшылары үшін көзге түскен студенттерді жұмысқа тарту үшін жасалып отырған бір шара екен. Жыл сайын колледж «Білім. Жұмыс. Мансап» атты арнайы көрмеге қатысады. Ол жерде де бітірушілер өңірдегі кәсіпорындардың жұмысымен танысып, жұмысқа орналасудың мол мүмкіндігі бар. Бүгінде колледждің күндізгі бөлімінде 2000-ға тарта жас білім алады. 34 жетім бала тегін білім алады. Оларға әлеуметтік көмектен өзге жұмысқа орналасуда да басымдық беріледі.

Жергілікті кадрға не жетсін...

Читайте также

Газета «Қазақстан теміржолшысы», №56 от 05 июля 2024 года