Жолсыз жерден жол салдық...

Новости

07.04.2017, 11:01

Сәуірдің 4 күні Маңғыстау облысына жұмыс сапарымен келген Мемлекет басшысы Каспий теңізіндегі көлік инфрақұрылымының дамуымен танысты. Ақтау теңіз солтүстік терминалында Елбасымен бірге Үкімет басшысының бірінші орынбасары Асқар Мамин бастаған топ болды. Каспий теңізіндегі көлік-логистика саласының дамуы мен бағыттары туралы «Қазақстан темір жолы» ҰК» АҚ президенті Қанат Алпысбаев баяндады. Екі жыл бұрын Елбасы Ақтау теңіз солтүстік терминалының іске қосылуына бастау берген болатын. «Ақтау теңіз порты» АЭА-ның 39,4 гектар алаңында біруақытта 5 000-ға дейін контейнер (TEU) мен 170 000 тоннаға дейін негізгі жүкті сақтауға болады. Заманауи, көп мақсатты терминалдың өндірістік қуаты жылына 3 млн тоннаға дейін негізгі жүкті, оның ішінде, 1,5 млн тоннаға дейін дәнді-дақылды ауыстырып тиеуге мүмкіндік береді. Жоба құны – 37,5 млрд теңгені құрайды. Қазіргі уақытта терминал астық, металл, контейнерлер мен негізгі жүктерді қабылдап жібереді. Вагондарға жүкті тиеп, оларды түсіреді, кемелерге кешенді қызмет көрсетеді. Бүгінгі таңда кәсіпорында Маңғыстау облысының 190 тұрғыны қызмет етеді. Елбасы Маңғыстау облысының энергетикалық, өнеркәсіптік және көлік-логистикалық әлеуеті зор екенін жеткізді. – Еуразияның дәл ортасында орналасқан Қазақстан әрдайым құрлықтағы ел болып саналып келді. Бүгінгі таңда біз құрлық ауқымымен шектеліп қалмай, томаға-тұйықтық шеңберін бұздық. Ақтауда заманауи теңіз портын салдық, бейнелеп айтқанда, «жолсыз жерден жол аштық», – деген Елбасы жүйелі дамудың жарқын мысалы ретінде «Ақтау теңіз порты» арнайы экономикалық аймағын атап өтті. Нұрсұлтан Назарбаев теңіз терминалының қызметімен танысып, оның даму перспективалары туралы кеңінен мағлұмат алды. Қазақстан Президентіне 2020 жылға қарай барлық порттың, соның ішінде Ақтау солтүстік теңіз терминалының қуаттылығын айтарлықтай арттыру жоспарланып отырғаны жөнінде баяндалып, «Жібек жолы» жүк тиеу кешенінің жұмысы таныстырылды. Сондай-ақ, Нұрсұлтан Назарбаев кәсіпорын ұжымымен де кездесіп, әңгімелесті. Салтанатты кездесуге Маңғыстау жүк тасымалы бөлімшесінің директоры Нәжімеден Ғұбашев, «Құрық порты» ЖШС бас директоры Мырзабек Сақтағанов, «Ақтау халықаралық теңіз сауда порты» ҰК» АҚ президенті Абай Түрікпенбаев, порт жұмысшы-қызметкерлері қатысты. –Еңбек нарығындағы тұрақсыздықты жою және аймақ тұрғындарын жұмысқа орналастыруға қолдау көрсету мақсатында Маңғыстау облысының әкімдігімен жасалған «Жаңа серпін» өңірлік бағдарламасының аясында, терминал үшін 27 адам оқытылды. Олардың көбісі біз үшін қажетті мамандықтар – механизатор-док жұмысшылары мен тальмандар. Олар Санкт-Петербург қаласының жанындағы теңіз портында оқытылды, – деп ақпарат берді кадр мәселесіне байланысты «Ақтау Теңіз Солтүстік Терминалы» ЖШС бас директоры Асқар Қарабасов.

Жолсыз жерден жол салдық...

Читайте также

Газета «Қазақстан теміржолшысы», №56 от 05 июля 2024 года