Жетпіс жылдық тарих таразылануда

Новости

11.04.2017, 16:46

Бес жыл уақыттан соң қайтадан ашылған «ӘТЖК» АҚ Семей филиалының тарихы тым тереңде. Әр жылдарда білікті мамандар мен тәжірибелі басшылар ұстаханасы болған іргелі мекеменің өткен күндерден шертер естеліктері де мол. Осы ретте филиалдың кәсіподақ ұйымының төрағасы Амантай Қатпенов тұңғыш рет тың бастаманы қолға алып отыр. Бүгінгі таңда төрт бағыт бойынша жылжымалы құрамдар қабылдап аттандыратын Семейдегі әскерилендірілген күзет қызметінің тарихы 1944 жылдың 29 тамызынан басталады екен. Осынау аралықта күрделі де ауқымды қызмет сатыларынан өткен мекеменің абыройлы еңбек жолы бар. Алайда, әр жылдардағы айшықты оқиғалар мерзімдік баспасөз беттерінде там-тұмдап жарық көргенімен осы кезеңге дейін жинақталмапты. Ал осы ретте Амантай Қатпенов мекеме тарихына қатысты жәдігерлер мен түрлі деректерді жинастырып, филиалдың өткен күндерінен сыр шертетін, жетпіс жылдық тарихты таразылайтын мұражай ашуды қолға алды. Қазіргі күннің өзінде жеке мұрағатында сақтап жүрген тарихи бұйымдарды экспозициялық көрмелерге әзірлеу үстінде. Олардың арасында сонау кеңес дәуірінде, 1984 жылы күллі Одақ бойынша жеңіп алған ауыспалы Қызыл ту, көне фотосуреттерден тұратын ескілікті альбомдар, 1951 жылы жарық көрген «Құрмет кітабы», мекеме ашылған алғашқы жылдары тұтынылған шаруашылық бұйымдары, т.б. заттар бар. Бұдан өзге «Құрметті теміржолшы» және «Үздік күзетші» атағын иеленген сала қызметкерлерінің еңбек және өмір жолдары туралы деректер мол. Қазіргі күні мекеме директорының орынбасары Арай Шаменовпен бірлесіп, мұражай композициясының жалпы мазмұнын пысықтау үстінде. – «ӘТЖК» АҚ Семей филиалының өткен тарихы да, бүгінгі күні де аса мазмұнды. Айта кетсек, біздің мекемеміз тек соңғы жылдары ғана бес бірдей «Құрметті теміржолшы шыққан кәсіби мамандар ұстаханасы саналады екен. Мұндай озық көрсеткіш республикамыздағы өзге 11 филиалдың бірде-бірінде жоқ. Ал, осынау абыройлы еңбек жолын жаңа толқын мен келергі буынға үлгі ету парызымыз деп білемін. Мақсат – мұражай ашып атақ шығару емес, кейінгі буын тәлім-тәрбие алатын дүние жасау, – дейді тың идеяның бастамашысы Амантай Қатпенов. Аталмыш мекемеде ұзақ жылдар бойғы еңбек өтілі бар ел ағасы кешегі күні алғашқы еңбек жолын қатардағы атқыш қызметінен бастап, қарауыл бастығы, команда бастығы сынды сатылы еңбек жолдарынан өтіпті. Мекеме тарихын, онда қызмет атқарған абырой иелерін де жақсы біледі. Бір бұл емес, жергілікті басылымдарға қалам тербеп, әріптестері мен филиал жұмысы жайлы очерк, танымдық материалдар да беріп тұрады. Қазіргі күні жеті жүздің үстінде штаттық бірлігі бар, «Құрметті теміржолшы» Асхат Искаков жетекшілік ететін мекеменің рухани өміріндегі елеулі жаңалықтың бірі осы.

Жетпіс жылдық тарих таразылануда

Читайте также

Газета «Қазақстан теміржолшысы», №56 от 05 июля 2024 года