Жаңасемейше жаңару мен жаңғыру

Новости

04.05.2017, 20:27

Дәстүрге айналған сенбілік Семейде де жалғасын табуда. Қыс бойы теміржолға жақын тұратын қала тұрғындары тастаған қоқыстан жол бойын тазалаған жаңасемейліктерге әріптестері көмекке келді. Оңтүстік өңірден қатынайтын пойыздар бірінші Жаңасемей станциясына келеді, ендеше пойыздағы жолаушылардың көзі бірден жол бойындағы бей-берекет шашылып жатқан қалың қоқысқа түсері қақ. Теміржолды бойлай шашылған неше түрлі қалдықтан адам шошырлық. Жерлестеріміздің мәдениетінің төмендігіне қынжылмасқа шараң жоқ. Әйтпесе, осы жолдың бойы да қаланың аумағына жататынын, жөңкіген пойызбен келіп-кетіп жатқан қонақтардың көзіне осы келеңсіздік түссе, жалпы қаламыз жайлы қонақтардың теріс пікірі қалыптасатынын ескермес пе?!. Мұны теміржолшылар қауымы жақсы түсінеді. Сол себепті Семей вагон пайдалану депосы бастығының орынбасары Ерзат Хасенов бастаған вагоншылар Жаңасемейдегі әріптестеріне көмекке келді. Жаңасемейліктер де құрал-саймандарын сайлап дайын отыр екен. Көмекке келген топ жетісімен дереу жол бойына аттанып қызу жұмысқа кірісіп кетті. Олар 2-3 км жолдың бойын қоқыстан тазартып, бірнеше көлікке тиеген қоқысты оны қала сыртына шығарды. – Тазалық деген қазақ үшін бір киелі ұғым ғана емес, бұл ежелден қалыптасқан біздің өмір салтымыз, дәстүріміз. Сондықтан да, бүгінгі мынау жалпықалалық сенбілікке біршама теміржолшылар қатысып, шаруашылықтарын ретке келтіріп, жалпы қаланың тазалығына үлестерін қосты. Шаһарды әсемдеуге, осындай жақсы дәстүрге өзінің бір септігін тигізген вагоншыларға ризашылығымды білдіргім келеді, – дейді өз ұжымымен бірге тазалық жұмысына қатысып жүрген Семей вагон пайдалану депосының бастығы Асет Сүлейменов. «Тазалық – денсаулық кепілі» деген сөзді әрқайсымыз жақсы білеміз. Оны айтпағанның өзінде, қаламыздың көркі ажарланып тұрғаны әркімге ерекше көңіл-күй сыйлайды. Семей – ұлы адамдар туған киелі мекен. Ендеше қала тұрғындары осыны терең түсініп, қаламыздың сол киелі атына лайықты болуы үшін қолдан келгенін жасап, жол бойын ластауды доғарса екен деген теміржолшылар тілегін жеткізе кеткенді де жөн көрдік. Теміржолшылар қауымының мақсаты – бір күндік сенбілік өткізіп, тазалық жүргізумен шектелмейді. Дәл осындай қоғамдық жұмыстар әлі де жалғасын таба береді.

Жаңасемейше жаңару мен жаңғыру

Читайте также

Газета «Қазақстан теміржолшысы», №56 от 05 июля 2024 года