Теміржолшылар кеңесіне – ширек ғасыр

Новости

19.05.2017, 10:15

18-19 мамырда Мәскеуде өткен Достастыққа қатысушы елдердің теміржол көлігі Кеңесінің 66-шы отырысына «Қазақстан темір жолы» ҰК» АҚ басшысы Қанат Алпысбаев бастаған делегация қатысуда. Мерейтойлық отырысқа Әзербайжан, Армения, Беларусь, Грузия, Қырғызстан, Молдова, Ресей, Тәжікстан, Түрікменстан, Украина, Өзбекстан теміржол әкімшіліктерінің жетекшілері, сонымен қатар Кеңестің қауымдастығына мүше елдер Болгария, Грузия, Латвия, Финляндия теміржол әкімшіліктерінің басшылары қатысты. Сонымен қатар бақылаушылар ретінде Иран теміржол әкімшілігі мен Теміржол және көлік құрылысшылары кәсіподақтары Халықаралық Конфедерациясының өкілдері қатысты. Кеңестің 25 жылдығына арналған отырыста Достастыққа қатысушы елдердің теміржол көлігі қызметінің жұмыс қорытындысы шығарылды. 2016 жылғы және 2017 жылғы бірінші тоқсандағы халықаралық бағдардағы жолаушылар тасымалдаудағы теміржолды пайдалану қорытындысы бойынша Кеңестің 65-ші отырысы шешімдерінің орындалу нәтижесі қаралды. Отырыс барысында пойыз қозғалысының нормативтік кестесі, өткен жылғы жүргізіліген контейнерлер санағының қорытындысы, биылғы жылы жүк вагондары санағын жүргізуге дайындық барысы, теміржол көлігі әкімшіліктері арасындағы өзара есеп айырысу жайлары секілді ондаған мәселе қаралды. Жалпы алғанда, отырысқа қатысушы елдер арасындағы теміржол көлігінің тұрақты қозғалысын ұйымдастыру, жолаушылар мен жүк пойыздарының кедергісіз жүруін қамтамасыз ету қарастырылып, келісілді. Өткен жылы ТМД елдері темір жолдарында өндірістік көрсеткіштер жақсарғаны белгілі болып отыр. 2015 жылмен салыстырғанда жүк тиеу жоспары 100,9% орындалып, биылғы жылғы алғашқы тоқсанда 2016 жылдың сәйкес мерзімімен салыстырғанда 5,8% артқан. Өткен жылы 1946,9 млн тонна жүк тасымалданса, биылғы бірінші тоқсанда 480, 4 млн тонна жүк жөнелтілген. Теміржол әкімшіліктері арасында өткен жылы мен биылғы бірінші тоқсанның міндеттемесін асыра орындаушылар қатарында «Қазақстан темір жолы» ҰК» АҚ да бар. Биылғы жылдың алғашқы тоқсанында жолаушылар тасымалдау көлемі 3,5 пайызға өскен. Тек қаңтар-наурызда Компания 4,5 мың жолаушы тасымалдаған. Кеңес барысында «ҚТЖ» ҰК» АҚ басшысы Қ. Алпысбаев халықаралық серіктестікті дамытуға қосқан үлесі үшін «Құрметті теміржолшы» белгісімен марапатталды. Сондай-ақ, Компанияның бірқатар қызметкерлері Достастыққа қатысушы мемлекеттердің теміржол көлігі Кеңесінің Құрмет грамотасымен марапатталды. Кеңес жұмысы жайлы толық ақпарат газеттің келесі санында жарияланады. Достастыққа қатысушы елдердің теміржол көлігі Кеңесінің тарихына тоқталсақ: 1992 жылы Достастыққа қатысушы елдердің басшылары посткеңестік кеңістікте теміржол көлігі саласын дамыту мен қызметін үйлестіріп отыратын мемлекетаралық стратегиялық маңызды шешімдерді шығарып отыратын ұйым құрды. Теміржол көлігі жөніндегі Кеңес ТМД елдері серіктестігін дамытуға тиімді ықпал еткен маңызды шешімдер қабылдаған алғашқы мекемелердің бірінен саналады. Осы жылдары Кеңес экономикалық ынтымақтастықтағы үкіметаралық орган ретінде қалыптастырды. Кеңес отырысындағы іскерлік қадамдар «1520 кеңістігіндегі» теміржолдардың тұрақты және тоқтаусыз қызмет етуін қамтамасыз етті.

Теміржолшылар кеңесіне – ширек ғасыр

Читайте также

Спецвыпуск газеты «Қазақстан теміржолшысы» от 8 мая 2025 года