Балалар қуанған күн

Новости

06.06.2017, 15:03

Халықаралық балаларды қорғау күні Атырау жүк тасымалы бөлімшесі теміржолшылардың балалары үшін есінен кетпейтін қызықты мерекелік шара өткізді. Алдымен «Ақжайық» стансасына экскурсияға барған балаларға маневрлі тепловоздың жұмысы таныстырылды. Машинист нұсқаушысы Асқар Сарыбаев балаларға тепловоз туралы толық мағлұмат беріп, тепловоз кабинасына таласа- тармаса көтеріліп, қондырғыларын ұстап көруге ниет білдірген балаларға алып машинаның бүкіл тетіктерінің қызметін жіктеп, түсіндіріп берді. 12 жастағы Арман Максимов «Ержеткенде машинистің көмекшісі боламын, сосын машинистің өзі боламын. Тепловоз жүргізген керемет!» – деп алғашқы әсерімен бөлісіп те үлгерді. Бұдан соң Атырау жүк тасымалы бөлімшесінің акт залына жиналған балаларды бөлімшенің бас инженері Бауыржан Қартан мен бөлімшенің бастауыш кәсіподақ ұйымы төрағасы Орынбасар Раисовтар мерекелерімен құттықтады. Бөлімше басшылығы жазғы демалыстың басталуына орай балаларды теміржол бойындағы қауіп-қатерлерден сақ болуға шақырды. –Жазғы демалыс кезінде теміржолға жақын орналасқан елді мекендердегі балалар, жолдың үстіне шығып ойнайды. Балалардың вагондар терезелеріне шағуы, теміржолдың бөлшектерін ұрлауы, сондай-ақ рельстерге бөтен заттар қойып, пойыздарды шұғыл тежеуге мәжбүрлеуі сынды теріс қылықты жасауға әуес болмаңдар. Каникулды пайдалы іспен айналысып, қызықты өткізуге тырысыңдар, – деген бас инженер Бауыржан Қартан теміржолшылардың балаларының жазғы демалыс лагері ұйымдастырылатыны туралы да хабарлама айтты. Балаларға арналған қызықты шара одан әрі қарай «Теміржол – балалар көзімен», «Ана, әке және мен», «Ержеткенде кім боламын?», «ЭКСПО-2017» атты тақырыпта сурет салу жарысына ұласты. Жеңімпаздарға сыйлық үлестірілді. Мерекелік шара соңы балалардың кәсіподақ девизімен флешмоб биімен аяқталды. Кәсіподақ өкілдері бүлдіршіндерге тәтті тағамдар мен сусындар таратты.

Балалар қуанған күн

Читайте также

Газета «Қазақстан теміржолшысы», №42 от 17 мая 2024 года