Биологиялық бақта немесе табиғатпен танысу

Новости

09.06.2017, 11:45

Семей теміржолшыларының балаларына арнап жергілікті салалық кәсіподақ ұйымы тағы бір ерекше сый жасады. Қазақстан кәсіподағы қызметінің 25 жылдығымен орайластырылған шарада балалар Ертіс өзенінің ортасындағы әсем аралда орын тепкен биологиялық орталыққа саяхат жасады. Бұл күні теміржолшылар мен олардың балалары үшін орталыққа кіру, ондағы хайуанаттар әлемімен танысу тегін болды. Бір күндік танымдық шара барысында балалар уақытының тиімді өтуі үшін аталмыш биологиялық орталықта арнайы экологиялық дәрістер де өткізілді. Балдырғандар тек тордағы аң-құсты тамашалап қана қоймай, олардың төлдерін, балапандарын қолдарына ұстап, жақын танысуға да мүмкіндік алды. Бұл ретте, тасбақа, ақ тышқан, қоян көжектері балалардың ерекше сүйсінісін туғызды. Бірқатары пони жылқысына мініп серуендесе, енді бірі пәуескемен әсем бақ ішін армансыз аралады. Балалар үшін сайқымазақтар да өнер көрсетті, суретке түсті. Аталмыш шараның бел ортасында балақайлар қызық-қуыныштарына ортақтасып, салалық кәсіподақ басшысы Алик Досановпен бірге демеушілік көрсетуші биологиялық орталық директоры Валерий Николаевич та жүрді. – Теміржолшылардың балалары үшін бүгін осындай сый әзірледік. Қаланы қыдыртып, театрға немесе киноға баруды жылда көріп жүр. Бұл жолы балалар бір сәтке болсын қала өмірінен жырақтап, табиғатпен етене араласып, жан-жануарлар әлемімен жақын таныссын дедік. Бұл іс олардың бойларында ізгі қасиеттер қалыптастырады, - пікір білдірді орталық басшысы. Осылайша, жазғы каникулдың бір күнін биологиялық бақта тамаша өткізген балалар мен олардың теміржолшы ата-аналары салалық кәсіподақ басшыларына алғыстарын жаудырып жатты. Бұл күні ауа-райы да тамаша болды. Табиғат аясында күні бойы серуендеп, бұғы, еліктер мен таутайлаққа тәттілер беріп, әткеншек теуіп, қызыққа қаныққан балалар киви дәмі бар балмұздақ жеп тарасты.

Биологиялық бақта немесе табиғатпен танысу

Читайте также

Газета Қазақстан теміржолшысы, №51 от 04 июля 2025 года