Тарлан теміржолшы - 80 жаста

Новости

09.06.2017, 11:59

Қызылорда жүк тасымалы бөлімшесінің Құрметті теміржолшысы, Әнуар Төлегенов мамыр айында сексен жасқа толып отыр. Осынау сексен көктемінің жартысынан астамын аймақ теміржолының өркендеуіне сарп еткен қарт теміржолшы әлі де тың да қуатты. Қарт теміржолшыны торқалы тойымен құттықтап Қызылорда локомотив пайдалану депосы директорының орынбасары Ізбасқан Сүйінов пен аймақтық теміржолшы ардагерлер ұйымы төрағасы Қазбек Рахметов және бөлімше кәсіподақ ұйымы төрағасы Мұқтар Өмірзақұлы бастаған әріптестері келіп, бөлімше басшылығының құттықтауын жеткізіп, бағалы сыйлығын тарту етті. Сырдың жоғары бастауындағы Өзгент ауылында дүниеге келген Әнуар Төлегенов алғашқы жұмысын жылдамдық таспасын алушы болып бастап, онан кейін слесарь, тепловоз машинисінің көмекшісі, профилактикалық жөндеу шеберінің көмекшісі, цех шебері, 1967 жылы депо бастығының жөндеу жұмыстары жөнінде орынбасары жұмыстарын атқарады. 1970-1977 жылдар аралығында Гурьев, Ақтөбе бөлімшелерінде локомотив деполарында басшылық қызмет жасап, Қызылорда бөлімшесіне ауысады. 1998 жылы зейнет демалысына шыққанға дейін локомотив депосын, бөлімшенің локомотив бөлімін басқарады. -1987-1994 жылдары аралығында бөлімше телімдерінен тәулігіне 40-тан аса жүк құрамалары, 15-18 жұп жолаушылар пойыздары өткізілетін болған. Менің алғаш қолға алған шаруам - қосымша бригадалар ұйымдастыру болды. Әрбір ауысымға, цехтарға тәжірибелі инженерлер мен технологтар бекітіліп, еңбек тәртібін бақылау күшейтілді. Алғаш болып «үлгілі цех» атағын жеңіп алу үшін конкурс ұйымдастырылды. Бумен жылытылып келген депоны сумен жылытуды ойластырып, екі бірдей жаңа қазандық орнаттық. Сол кездегі «Тұрғын үй-91» бағдарламасына орай өз күшімізбен 18 пәтерлі екі үй салып теміржолшылардың пайдалануына бердік. Осының бәрі атағымызды шығару үшін емес, кейінгі ұрпақтың қажетіне жарамды бір сауапты іс атқарайық деген ниетпен атқарылды,- деп өткенді еске алады ардагер. Әнуар Төлегеновты жергілікті халық қалалық кеңеске депутат етіп сайлайды. Сол жылдары да депутаттық мандатын пайдаланып теміржол бойындағы халықтың талай проблемасын шешуге мұрындық болғанын бүгінде ел біледі. Екі мәрте «Ерен еңбегі үшін» медалімен марапатталған тарлан теміржолшы бүгінде сексеннің сеңгіріне толып, ел-жұртына сыйлы абыз ақсақал атанып отыр.

Тарлан теміржолшы - 80 жаста

Читайте также

Газета Қазақстан теміржолшысы, №21 от 20 марта 2026 года