Шаттл пойызының тиімділігі

Новости

19.09.2017, 11:08

Шаттл пойыздарын ұйымдастыруда Семей ЖТ бөлімшесі көш бастап тұр десек артық айтпаймыз. Бөлімше бойынша пойыз қозғалысының тиімділігін арттыру мен жүк айналымын жүйелендіруге бағытталған жаңашыл шаралар нәтижелі аяқталды. Бұл ретте өткен жыл мен соңғы жартыжылдықтағы өндіріс барысында қолданылған тың тәсілдер сенімді толықтай ақтады. Соның аясында ауыр салмақты пойыздарды жолға шығару, Шаттл пойызын жасақтау сынды жауапты жұмыстар соңғы 8 ай ішіндегі көрсеткіш бойынша күрт қарқын алды. Әсіресе, жүк жеткізуге тапсырыс беруші клиенттерді Жаңасемей станциясында құрастырылатын Шаттл пойызы ерекше қызықтыруда. Осыған дейін бұл жетістікті шараны тек құрылыс материалдарын өндіруші «Almix» ЖШС компаниясы ғана пайдаланып келсе, жуырда аталмыш пойызды жасақтап жүк жеткізуге «Семей цемент зауыты» АҚ тапсырыс беріпті. Осы орайда қаланың өндірістік ауданында орын тепкен Жаңасемей станциясында хоппер-вагондар арқылы Алматы-1 және Астана станцияларына цемент жүгі жеткізілді. Жолға шығарылған 90 вагоннан тұратын 11 жөнелтілім жолаушылар пойызының жүру тәртібімен діттеген жерге небары бір тәулік ішінде ғана жетті. Бұл жергілікті тапсырыс берушілерді қанағаттандырып отыр. Ал, осыған дейін жүк Алматы қаласына 2,3 тәулікте жеткізілсе, Астана станциясына 5,3 тәулікте баратын еді. Сонымен қатар, осыған дейін Шаттл пойызының игілігін пайдаланып жүрген «Almix» ЖШС тапсырыс санын тағы да арттырып отыр. Аталмыш компанияның жүк тасымалы бағыты 5 пайызға ұлғайтылды. Қазіргі күні жүк айналымы мен логистикаға жауапты бөлімше мамандары Шаттл пойызының тиімділігін есептеп шығарды. Алдағы уақытта аймақтағы ең ірі әрі тораптық Семей станциясында да аталмыш жүрдек жүк пойызын құрастыру көзделуде. Алайда, ол үшін экономикалық тиімділіктер жан-жақты сарапталуы тиіс. Ал, Шаттл пойызының тұрақты түрде жолға қойылуы кірісті еселеп, желі бойындағы пойыз қозғалысын жүйелеуге септігін тигізеді.

Шаттл пойызының тиімділігі

Читайте также