Өткелде орын алған оқиға

Новости

28.11.2017, 18:53

25 қараша күні Маңғыстау өңірінде елді шулатқан қайғылы оқиға болды. 36 адамды мінгізіп алған Газель көлігі Жаңаөзеннен Теңге елді мекеніне бара жатып, темір жолды кесіп өтпек болғанда тепловозбен соқтығысып, соның салдарынан 9 адам тіл тартпай, ажал құшты. Солардың қатарында автокөлік жүргізушісі де бар. Оқиға орнына шұғыл жеткен өңірдің темір жол басшылығы дереу жиын өткізіп, істің ақ-қарасын анықтауға тырысты. Ал кеше Астанадан «ҚТЖ» ҰК» АҚ бас инженері Батыр Қотырев бастаған бір топ теміржол басшылығы келіп, қайғылы оқиғаға қатысты. Маңғыстау ЖТ және магистральдық желі бөлімшелері басшыларының, өңір әкімшілігі өкілдерінің қатысуымен үлкен жиын өткізді. Бұл жиналыстың мақсаты – төтенше оқиғаның орын алуы себептерін, кінәлі адамдарды анықтау, теміржолшылар тарапынан қандай қателікке жол берілді, тағысын тағы мәселелерді талқылау болатын. Қолдағы бар соны деректерге сүйенсек, оқиға орын алған өткел күзетілетіндер қатарында. Ондағы шлагбаум автоматты түрде ашылып-жабылады екен. Алайда, сол күні шлагбаум істен шығып, жабылмай тұрған. Бірақ, жол қозғалысы ережесі бойынша көлік жүргізушісі темір жол өткеліне келгенде тоқтап, локомотивтің жоқ екеніне көз жеткізуі тиіс. Оның үстіне бағдаршамда қызыл белгісі жанып тұрған. Бұл туралы Маңғыстау ЖТ бөлімшесі директоры Н.Ғұбашев былай дейді: –Өте қайғылы оқиға орын алды. Мұның бәрі жол қозғалысы ережесін көлік жүргізушісінің өрескел бұзуынан болды. 13 адамдық Газельге 36 адам тиеп алған. Үш есе адамды көп тиеп алған автокөліктің келе жатқан тепловоздың алдын қиып өтпек болғаны жүргізушінің сауатсыз әрекетін көрсетсе керек. Тепловоздың лентасында машинистің шұғыл тежегіш басқаны анықталып отыр. Және де өткел кезекшісі шлагбаум істемей қалған күнде келе жатқан көлікті көріп, оған жолдан өтуге тиым салған белгі беру керек еді. Қазір өткел кезекшісі уақытша қамауда. КІІБ тергеу жүргізіп жатыр. Бөлімше басшысы сөзінен белгілі болғандай, Жаңаөзен қаласының әкімшілігі «ҚТЖ» ҰК» АҚ басшылығы атына оқиға салдарынан зардап шеккендерге ақшалай көмек беру туралы хат жолдапты. Хатта үш тізім берілген. Біріншісі, қайтыс болған отбасыларына көмек, екіншісі ауыр жарақат алғандарға, үшіншісі, жеңіл-желпі жарақат алушыларға ақшалай көмек екен. Қазір Компания зардап шегушілерге қаржылау көмек көрсету жағын қолға алған. Бұл оқиға қатысты Маңғыстау өңірінде бірнеше талқылау жиындары өтіп жатыр. Әр сала өзіне қатысты тергеу жұмыстарын жүргізуде. Газельмен соқтығысқан тепловоз қазір жөндеуге жіберілген. Оған келген шығын сомасы әзірге белгісіз. Өңірдегі жиналыстардың қорытындысы бойынша хаттама толтырылып, кейін Астанада кеңейтілген талқылау жиналысы өтеді деп күтілуде.

Өткелде орын алған оқиға

Читайте также

Газета Қазақстан теміржолшысы, №46 от 16 июня 2026 года