Тест тапсырды

Новости

28.11.2017, 18:56

Атырау жүк тасымалы бөлімшесінде облыстық жұқтырылған иммун тапшылығы орталығының алдын алу бөлімінің мамандары әлемде таралған қауіпті жұқтырылған иммун тапшылығының синдромы дертінен сақтандыру мақсатында теміржолшылармен ашық диалогта кездесу өткізді. Теміржолшылар өз еріктерімен адам иммун тапшылығы вирусы сынамасын тапсырып, қорытындысын алды. Атырау ЖТ бөлімшесінің бас инженері Бауыржан Ақназарұлының бастамасымен ұйымдастырылған шарада облыстық ЖИТС орталығы мамандары «Есірткі құрбаны» атты сахналық қойылым қойды. Жас отбасының ұйып отырған шаңырағында дүниеге келген сәбиде ЖИТС дертінің болуы екі жастың сынаққа шыдамай, ажырасуына әкелгені бүгінгі қоғамда осындай оқиғалардың жиілеп кеткенінен хабардар еткендей еді. Атырау облыстық ЖИТС орталығының алдын алу бөлімінің меңгерушісі Маржан Зейноллақызы бастап келген мамандар адам иммун тапшылығы вирусы инфекциясының эпидемиологиялық жағдайы, берілу және сақтану жолдары туралы, АИТВ-мен өмір сүретін адамдардың құқықтары мен кемсітушілік туралы айтып, теміржолшылардың сұрақтарына жауап берді. Облыстық ЖИТС орталығының алдын алу бөлімінің меңгерушісі Маржан Зейноллақызы: –Атырау облысы бойынша 262 адамнан адам иммун тапшылығы вирусы дертімен есепте тұр. Оның дені – шетелдіктер. Қазір 20-39 жас аралығында осы дерттің белгілері жиі анықталуда. Биыл дүниеге келген 1 сәбиден анасы арқылы жұққан дерт анықталды. Бұл дерттің алдын алу және емін алып өмірді ұзартуға болатынын халыққа түсіндірудеміз. Біздің осы мақсатымызды теміржолшылар ұғынып, сұрақтар қоюы бізді қуантты. Әдетте мұндайда белсенділік төмен болып жатады. Бірақ біздің теміржолшылармен ашық әңгімеміз қызу болды, – деп теміржолшылардің белсенділігіне риза болды. Сайып келгенде ЖИТС орталығы мамандары лезде қорытынды нәтижесін шығаратын заманауи сынама құрлығысы арқылы өз еріктерімен анализ жасауға ниет еткен теміржолшылардан қан алып, 10 минутта нәтижесін шығарып берді. Орталықтың бөлім меңгерушісінің айтуынша, сынама тапсырған теміржолшылардың қанынан жұқпалы адам иммуны тапшылығы вирусы белгілері анықталмады. Аурудың алдын алудағы осындай профилактикалық жұмыстар, дерттің алдын алумен қатар дерт анықталған жағдайда дер кезінде емделіп, айығуға септігін тигізеді. Сондықтан Атырау жүк тасымалы бөлімшесінің медицина саласының мамандарымен бірлесіп жұмыс атқаруы өзге салаларға да үлгі боларлық.

Тест тапсырды

Читайте также

Газета Қазақстан теміржолшысы, №46 от 16 июня 2026 года