Сексеуіл мен Қоскөлдің арасында…

Новости

15.12.2017, 14:20

Ел экономикасын өркендетуге бағытталған «Нұрлы жол» бағдарламасын іске асыру барысында 2014 жылдың тамыз айында Елбасы пәрменімен пайдалануға берілген Бейнеу – Жезқазған темір жолының жалпы ұзындығы 272 шақырымдық Сексеуіл – Қоскөл жаңа телімі Қызылорда ЖТ бөлімшесіне қарайды. Бүгінде телім бойымен тәулігіне 5-6 жұп жүк пойыздары жүйткуде… Жаңа жолмен жүк пойыздарынан бөлек, жергілікті тұрғындардың қатынасы үшін №617-618 Қызылорда-Жезқазған жолаушылар пойызы мен айына 4 мәрте Сексеуіл-Қоскөл бағытында жұмысшы пойызы да жүріп жатыр. Қазіргі таңда бөлімшенің батыс солтүстігіндегі кезінде бөкендер мекен етіп, көшпелі барқан құм суырған аңызақ желдің үнін біріне-бірі тізбектелген теміржол керуені доңғалақтарының дыбысы алмастырып, өңірге жаңа тіршіліктің дәні себілді. Кешегі шөлейтті, қиян даланың белін буып жаңа заманға бейімделуге шақырған беубеу тәрізді болатжол төселіп, Шығыс пен Батысты жалғайтын тағы бір төте жол салынуы – ел экономикасының қуаттылығын арттырып, отандық теміржолдың тынысын ашатын тиімді жоба болумен қатар, аймақ халқының әлеуметтік тұрмыс-тіршілігіне шырай кіргізгені анық. Бүгінде телім бойында жұмыс жасап жүргендердің бәрі жергілікті тұрғындары. «Жол жағалағанның өзегі талмас» демекші, жаңадан ашылған станция мен бекеттерде қаншама адам жұмыс тауып, отбасы нәпақасын айырып, жүздеген жандардың күнкөріс көзіне айналды. Бекеттер мен өндірістік нысандар Сексеуіл – Қоскөл телімі бойында шекаралық Қоскөл станциясынан өзге Қарашеген, Абай, Промежуточная деп аталатын 3 станция мен 10 бекет бой көтерді. Телімнің инженерлік-инфрақұрылымы жасалып, вокзал ғимараттары мен әлеуметтік нысандармен қатар көпір, су өткізу құбырлары, жол өтпелері секілді 154 жасанды құрылыс нысаны бой көтеріп, өндірістік ғимараттар бүгінде жүк және жолаушы тасымалына қызмет жасап тұр. Станция мен бекеттердегі қабылдап-жөнелту жолдарына 73 шартты бірлікті ұзынқұрамдар емін-еркін сияды. Пойыздардың қозғалыс қауіпсіздігін сақтауға қызмет жасау үшін жаңадан Қазалы электрмен жабдықтау дистанциясы мен Сексеуіл жол дистанциясы құрылып, телімде жұмыс жасауда. – Қазіргі таңда «Қарашеген», «Абай», «Промежуточная» станциялары мен №15-бекетте бір-бірден қос пәтерлі тұрғын үйлер вахталық ауысыммен жұмыс жасайтын теміржолшылардың игілігіне берілген, ал қалған бекеттерде қажетті жабдықпен қамтамасыз етілген модульдер қойылған. Телімдерде электр қуатымен қамтитын 3 постанция және құрылғылар жұмысына Қазалы электрмен жабдықтау дистанциясының Құрметті теміржолшы Есім Тұрсынбаев басшылық жасайтын 21 электромеханигі мен 20 электромонтері жауапты. Қазалы вагон пайдалану депосының 25 вагон қараушысы, Сексеуіл мен Жезқазған станциясы аралығындағы жол күтімін жасайтын Сексеуіл жол дистанциясында еңбек ететін 220 жол жөндеушілер жұмысы телімде қозғалыс қауіпсізідігін толық қамтамасыз етіп отыр, – дейді Сексеуіл – Қоскөл телімінің учаскелік ревизоры Айділда Наурызәлиев. Жүк тасымалында контейнерлік пойыздар құрамы бөлімшенің осы Сексеуіл – Қоскөл жаңа телімінде басымдыққа ие. Биылғы он ай ішінде бөлімше бойынша өткізілген 1567 контейнерлік пойыздың, өткен жылдың сәйкес мерзімінде өткен 959 контейнерлік пойыздың 700-ден астамы осы теліммен өткен. Пойыздардың маршруттық жылдамдығы тәулігіне орташа есеппен 846,0 км/сағат болып белгіленсе, іс жүзінде 1072,44 км/сағатқа өскен. Қарашеген станциясы Жаңа телім бойындағы Қарашеген станциясында кілең жастар жұмыс жасауда. Станция бастығының міндетін атқарушы Ерлан Шүренов теміржолшылар әулетінің өкілі, алғаш жұмысын осы телім бойында бағыттама қосынында кезекшісі болып бастаған екен. Жас болса да телім бойында тәжірибе жинап үлгерген маман қазірде бекеттегі барлық жұмысқа басшылық етеді, станция кезекшісі, жолшы, вагон қараушы секілді сала мамандарының жұмысын үйлестіріп отыр. Бүгінгі кезекте жүрген станция кезекшісі Ербол Сейсенбаев, бағыттама қосыны кезекшісі Нұлан Орекешов және КТСМ құрылғысымен вагондарды бақылап жүрген вагон қараушы Аймұрат Әлмұратұлы қай-қайсысы болса да тәжірибелі теміржолшылар қатарынан саналады. –Сексеуіл – Қоскөл телімінің салынуы өңір халқының тұрмыс-тіршілігіне ерекше серпін берді. Жаңа жобаның экономикалық-әлеуметтік маңызын ең алдымен осы тармақтың бойында жатқан өңірдің халқы сезінгені де рас. Шойын жол салына бастаған кезден пайдалануға берілгенге дейін де қаншама адам жұмыспен қамтылды, темір жол салынуымен өңір халқының ертеңгі күнге деген сенімі арта түсті, – Қызылорда бөлімшесінің персоналды басқару бөлімінің басшысы Нұрлан Бимұратов. Теміржолшылар – жергілікті тұрғындар Жол пайдалануға берілген күннен бастап жаңа телімде қызмет көрсететін штат толықтай жасақталған. Станция және бекет кезекшілері – 62 адам, бұрма постының кезекшілері – 93 адам, 3 станция бастығы мен 1 учаскелік қауіпсіздік ревизоры, барлығы 159 адам жұмыспен қамтылыпты. Персоналды басқару бөлімі басшысының мәлімдеуінше, жұмысқа қабылданғандардың түгелі дерлік жергілікті тұрғындар. Әсіресе, темір жол бойында жатқан Сексеуіл, Абай, Атанши, Шижаға ауылдарының тұрғындары қамтылыпты. Ағымдағы жылы Сексеуіл – Қоскөл жаңа телімінің жұмысына тағы 12 теміржолшы қабылданып, олар арнайы пысықтау, шыңдау дәрістерінен өтіп, тәжірибелі теміржолшыларға бекітіліпті. Бекеттер, оның ішінде теміржолшылар отбасы қысқы көмір-отынмен толық қамтамасыз етілген, ал ауыз су тапсырыспен 10 күн сайын «су керуенімен» жеткізіледі екен.

Сексеуіл мен Қоскөлдің арасында…

Читайте также

Газета Қазақстан теміржолшысы, №46 от 16 июня 2026 года