Көлік колледжіне – 10 жыл

Новости

05.01.2018, 11:20

Мұхамеджан Тынышбаев атындағы Қазақ көлік және коммуникациялар академиясы Ақмола колледжінде мерейтой. Көлік саласында мамандар дайындап шығаратын оқу орнына биыл 10 жыл. Осы аралықта 4 мыңға жуық түлектерді дайындаған колледж ұжымының өтіп бара жатқан жылда жеткен жетістіктері көп. Атап айтар болсақ, биыл наурыз айында Астана қаласы білімді бақылау департаментінен мемлекеттік аттестациядан, одан кейін осы қараша айында мамандандырылған аккредитациядан өткен. Осы және өзге де жаңалықтарымен колледж ұжымы мерейтой шеңберінде 21-22 желтоқсанда өткізілген ауқымды шара барысында таныстырды. –2017 жыл біз үшін өте ерекше өтті. Осы жылы түлектер ассоциациясын ашқалы отырмыз. 10 жылдық қарсаңында колледждің белсенді студенттерінің ата-аналарына Алғыс хаттар жарияланады. Бүгінгі шарада солардың есімі аталады. Сонымен қатар өнерпаз жастарымыз өз өнерлерін көрсетіп, концерт қояды. Сонымен бірге биыл колледжде «Алтын жүрек» номинациясын өткізген едік. Студенттер нағыз алтын жүректі оқытушыны анықтау мақсатында бір ай бойы дауыс берді. Сол ерекше ұстаз да бүгін анықталмақ, – деді шара алды бағдарламамен таныстырған колледж директорының тәрбие жөніндегі орынбасары Айнұр Сәрсенбаева. Кеш барысында М.Тынышпаев атындағы Қазақ көлік және коммуникациялар академиясының оқу ісі жөніндегі проректоры Ұ. Құттыбаев сөз алып, ҚазККА Президент-ректорының құттықтауын жеткізді. Шара барысында колледждің тарихына арналған мұражай ашылды. Оның ашылу рәсімінде мұражай лентасын техника ғылымының докторы, колледж директоры Ерлан Әуесбаев пен «ҚТЖ» ҰК АҚ «Теміржол көлігінің персоналының дамуы және бағалау орталығы» филиалы директорының орынбасары Мади Мұратбекұлы қиды. Оқу орны қазақтан шыққан тұңғыш инженер М. Тынышбаев есімімен аталатындықтан мұражайдың негізгі бөлігі алаш азазматының өмірі мен қызметіне арналған екен. Сонымен қатар колледждің осы он жыл ішіндегі бағындырған белестері мен тарихи сәттері бейнеленген экспозициялар және деректер, суреттермен жасақталған. Бұған қоса кеш барысында колледждің жетістіктерінен «Суреттер сөйлейді» фото көрмесі, «Мақсатқа жеткізер, құтты мекенге 10 жыл» әдістемелік көрмесі ұйымдастырылыпты. Сондай-ақ қалалық ашық есік күні ұйымдастырылып, оған Астана қаласы техникалық және кәсіптік білім беру ұйымдарының оқытушылары қатысты. Ашық сабақтар, сабақтан тыс іс-шаралар, мамандықтар шеруі өткізілді. Әрі қарай іс-шара оқытушы мен колледж бітіруші түлектер арасындағы «Ұстазы жақсының ұстамы жақсы» атты фестивалімен жалғасын тапты. Бұл іс-шараның мақсаты –колледжді аяқтаған түлектердің колледжбен байланысын нығайту. Бүгінде колледж 9 мамандық бойынша білім береді, материалдық-техникалық базасы оқу бағдарламасының соңғы талаптарына сай жабдықталған: слесарьлық, темір пісіру, электромеханикалық және ағаш шеберханасынан бөлек студенттердің тәжірибесі колледж ауласында орналасқан оқу полигонында да өтеді.

Көлік колледжіне – 10 жыл

Читайте также

Газета Қазақстан теміржолшысы, №34-35 от 01 мая 2026 года