Қар тазалалау науқанына жұмылды

Новости

19.01.2018, 18:28

ЖАМБЫЛ Жамбыл өңіріне биылдыққа алғаш рет қалың қар түсті. Төрт күн бойы үздік-үздік жауған қардың қалыңдығы 30 сантиметрге жетті. Тіпті, кейбір аумақтарда қар қалыңдығы 50 см жетті. Теміржолшылар жаппай қар тазалау науқанына кірісті. Қар тоқтамай жауған алғашқы күндері Жамбыл ЖТ бөлімшесі мен Жамбыл магистральдық желі бөлімшесінің қызметкерлері күндіз-түні кезекшілік ұйымдастырып, жұмысты жоғары деңгейде жүргізіп, жолдар мен стрелка бұрмаларын жиі қардан тазартып, қозғалыс қауіпсіздігіне нұқсан келтірген жоқ. Жүк және жолаушылар тасымалы бойынша кешігу немесе басқадай келеңсіздіктер орын алған жоқ. Жамбыл магистральдық желі бөлімшесі жол бөлімінің бастығы Ғалымбек Батырбековтың айтуынша, төрт күнде қосымша қар тазалау жұмыстарына барлық бөлімшелерден 277 адам жұмылдырылыпты. Алғашқы күні-ақ қар тазалайтын техникалар сақадай сай тұрды. Жол дистанциясының жұмысшылары да дайындықтың арқасында жұмыс кестесін дұрыс ұйымдастырып, қар тазалау шараларына қызу кірісті. Осы күндері СДПМ қар тазалағыш техникасы Шоқпар – Бел – Шоқпар, Қаратау –Промплощадка, Қаратау – Жаңатас аралығындағы телімдерді тазалап өтті. Шу станциясы мен Жамбыл станциясында да қар тазалау жұмыстары жүргізілді. Бүгін облыс орталығындағы Тараз вокзалы аумағындағы үйілген қарды жергілікті әкімдік өкілдері көлік бөліп, қала сыртына тасымалдап жатыр. Сондай-ақ, локомотив бригадалары темір жол аумағындағы жағдайда тұрақты түрде диспетчерге хабарлап отыр. Жуалы ауданындағы станцияларда жағдай бір қалыпты. Ол аумақта қардың қалыңдығы 50 см-ге жетті. Бірақ біздің теміржолшылар қандай жағдайға да сақадай сай, – дейді бөлім бастығы. ШЫМКЕНТ Жексенбіден бастап жауған ақ ұлпа шымкенттің шырайын кіргізіп тастады. Бүгінде тобыққа жеткен қарды техника күшінсіз жолшылар қол күшімен-ақ тазалап жатыр. Шымкент магистральдық желі бөлімшесінің диспетчері Нұрсұлу Қожабекованың айтуынша, 15 қаңтар күні Шымкент жол дистанциясынан 40, Арыстан 70 адам қар тазалауға шыққан. Жолшылар күндіз телім басында жұмыс істеп әрі бұрмаларды тазалап жүретіндіктен қалың қар жаумаса, күндіз қар тазалауға арнайы мамандар бөлінбейді. Қаңтардың 15-нен 16-сына қараған түні Шымкент жол дистанциясынан 38 жолшы қар тазалау науқанына қатысқан. Ал Арыста алғаш жауған қар сол күннің ертесі-ақ, еріп кеткен. Әдетте қар қалың түсіп, суық болатын Түлкібас өңірінде де әзірге қар анау айтқандай қалың түспегендіктен, мұнда да қар тазалайтын техника іске қосылмаған, жолшылар өз күштерімен игеруде. Түлкібас жол дистанциясының диспетчері Аман Әкімовтың айтуынша, қаңтардың 14-нен 15-не қараған түні бригадирлермен қосқанда 41 адам жолды аршыса, 15 қаңтарда таңертеңгі тоғыздан кешкі тоғызға дейін 67 адам бұрмаларды тазалап шыққан. Сол екі күн бойы күндіз және түнде кезекшілікпен 80 жолшы бөлініп жұмыс істеп, қозғалыс қауіпсіздігін қамтамасыз еткен.

Қар тазалалау науқанына жұмылды

Читайте также

Газета Қазақстан теміржолшысы, №70 от 04 сентября 2026 года