Ауыз суға кенелді

Новости

29.07.2016, 12:22

Семей қаласының дәл іргесіндегі шағын ғана елді мекенде «ақ түйенің қарны жарылды». Осыдан жарым ғасыр бұрын бой көтерген бекетке ауыз су келді. Не бары 28 шаңырақ тұратын елді мекенге аттай 23 жылдан соң тіршілік нәрінің қайта берілуі, теміржолшылар тілімен айтқанда «666 шақырым» аталатын ауыл тұрғындарын зор қуанышқа бөледі. Олар осыған дейін ауыз суды үш шақырым жердегі қаладан тасып ішіпті. Тұрғындардың басым көпшілігі зейнет жасындағы байырғы теміржолшылар. Ұзақ жылдар бойы сан мәрте жергілікті билік өкілдеріне де шағымданып, халық қалаулыларына дейін арызданғанмен нәтиже болмаған. Мәселе Семей жол бөлімшесінің басшысы Марлен Көкірекбаевтың аталмыш округ бойынша қалалық мәслихат депутаты болып сайлануымен жылдам шешімін тауыпты. Енді міне, ауыл ортасындағы құбырдан ауыз су тәулік бойы сарылдап ағып тұр. Кейбір тұрғындар ауыз суды үйлерінің ішіне дейін кіргізіп, барлық талапқа сай су есептегіш құрылғыларын да орнатып үлгерген. Бұл күні теміржолшылардың қуанышымен ортақтасуға бөлімше басшысы Марлен Көкірекбаев және қала әкімі Ермак Сәлімов арнайы келді. –Тіршілік көзінен тарыққан бізді кезінде республикалық телеарналардан да көрсеткен болатын. Арызданбаған құзырлы мекемеміз жоқ шығар. Тіпті, судың берілуінен күдер үзіп, өтініш жасауды да қойып кеткен болатынбыз. Тек биылғы көктемде бөлімше басшысы Марлен Кәрімұлының мәслихат депутаттығына сайланар шағындағы кездесуінде бастама көтеріп, өтініш жасадық. Міне, бүгін үмітіміз ақталды. Ауыз суды іргемізге әкеліп берді. Іргелі іске жәрдемші болған «Теміржолсу» АҚ қызметкерлеріне де алғысымыз шексіз, – дейді ауылдың үлкені, байырғы Жаңа-Семей жол дистанциясының теміржолшысы Сәмет ақсақал. Аталмыш жоба аз уақыт ішінде аяқталған. Скважина қазу тым қымбатқа түседі. Сондықтан да «Теміржолсу-Аягөз» мекемесі елді мекеннен 1,5 шақырым жердегі су құбырынан арнайы желі тартып берген екен. Техникалық құжаттамалардың реттелуіне бөлімше басшылары атсалысқан.

Ауыз суға кенелді

Читайте также

Газета «Қазақстан теміржолшысы», №99 от 22 ноября 2024 года