Отты жылдар естелігі

Новости

23.02.2018, 12:45

Бурабай курорты станциясында Кеңес әскерлерінің Ауған жерінен шығарылғанына 29 жыл толуына орай спорттық турнир ұйымдастырылды. Локомотив пайдалану депосының спорт залында шағын футболдан шымылдығын түрген турнирде Ақмола ЖТ бөлімшесі мен Бурабай курорты станциясы кәсіподақ ұйымының ұйымдастыруымен өткен турнирге теміржолшылардан құралған 8 команда қатысып, өзара бақ сынасты. Кілең «сен тұр – мен атайын» деп іріктеліп шыққан команда ойыншылары бір-біріне дес бермей тартысты ойын үлгісін көрсетті. Бірақ мықтының да мықтысы бар демекші, Бурабай рельс дәнекерлеу кәсіпорнының жігіттеріне жететін команда жоқ екені бір-екі айналымда-ақ белгілі болды. Жеңіс туын желбіреткен команда арнайы кубокты ұтып алды. Ал жүлделі 2-орынды жергілікті желілік полиция жігіттері иеленсе, локомотив пайдалану депосының командасы үшінші орынды місе тұтты. Үздік ойыншылар мен жүлдегер командалар дипломдар мен бағалы сыйлықтармен марапатталды. Жас теміржолшылар ауған соғысына қатысқан 12 ардагер-теміржолшыға құрмет көрсетіп, естелік әңгімелерін тыңдады. Ауған даласында мерт болған интернационалист жауынгерлерді бір минуттық үнсіздікпен еске алды. – Ауған соғысына қатысқан қазақстандықтар ішінде мен де бармын. Сонша жыл өтсе де ауған даласы естен кетпей, ауық-ауық жан жарасы мазалайтынын несіне жасырайық. Бүгін жас буынның құрметі мен қошеметін, өткенді білсек деген ниетін көріп, қатты қуанып та толқып отырмын, - деп алғысын білдірді Бурабай курорты станциясы техникалық бөлімінің инженері, ауған соғысының ардагері Кәриғұл Көмеков. Ал ауған соғысының тағы бір ардагері Нұрбек Әбілқасымов гитарамен «Ауғанстан» атты әнді шырқап, көпшіліктің қошеметіне бөленді.

Отты жылдар естелігі

Читайте также

Газета Қазақстан теміржолшысы, №3 от 16 января 2026 года