Кәсіби дағды – шеберлік

Новости

27.02.2018, 11:43

Қызылорда өрт сөндіру пойызының ұжымы облыс әкімі бекіткен жоспар бойынша аймақтағы авариялық-құтқару құрылымдарымен бірге тактикалық оқу-жаттығуға қатысып, өздерінің шеберліктерін шыңдады. Облыстық шеңберде қала горнизонының өрт сөндіру бөлімдері басшылығының ерекше бақылауымен өткізілген жаттығу жайлы пойыз бастығы, Құрметті теміржолшы Ғалымжан Табынбаев құрамның тактикалық, практикалық және кәсіби біліктілігі жоғары бағаланғанын мәлімдеді. Себебі, олар әр түрлі көлемдегі цилиндр пішіндегі 65 дана жанар-жағармай сақтайтын резервуардың ішінен 7500 текше метрлік резервуар артық қысым әсерінен жарылып, өртке оранған өрт ошағын бар-жоғы бір сағат ішінде ауыздықтай білді. – Бұл жолғы жаттығу облыс әкімдігінің бақылауымен қаладағы Оңтүстік өндірістік аймақтағы «Қорқыт ата әуежайы» АҚ жанар-жағармай сақтау қоймасында өткізілді. Жаттығу қоймада өткізілгендіктен біздің өрт сөндіру пойызынан өртті сөндіруге су таратылды. Жеке құрамнан 15 өрт сөндіруші қатыстырылып, олар жаттығуға қатысушылар арасында нағыз кәсіби маман екендерін дәлелдей білді. Біздің тарапымыздан бірде-бір олқылықтар жіберілген жоқ, – деді әріптестеріне разылығын білдірген ұжым басшысы Ғалымжан Табынбаев. Жаттығуға қатысқан бірнеше авариялық-құтқару құрылымдарының арасындағы өзара әрекет етудің ұйымдастырылуын тексеру мақсатында өткізілген өрт сөндіру оқу-жаттығуы шарасына қатысқан Қызылорда өрт сөндіру пойызы жауынгерлері осылайша, кез келген кедергіні бағындыра алатынын дәлелдеп, белгілінген бір сағаттық уақыт мөлшерін толық игеріп, өрт жалынын химиялық көбікті сумен тұмшалап, тілсіз жауды сөндіре білгені, біріншіден, кәсіби дағды, сосын шеберлік деп бағаланған. Өрт сөндіру бөлімдері жеке құрамалардың өрт сөндіру кезінде шұғыл іс-қимыл жүргізуі, құрам басшыларының шара барысында атқарар қызметін жетілдіру, жеке құрамның моральдық, психологиялық, жауынгерлік дайындығын дамыту және өрт сөндіру кезінде қауіпсіздік ережелерінің сақталуын қадағалау, шешуші бағыттың анықталуы, арнайы құралдарды тиімді пайдаланып, олармен бірлесіп іс-қимыл жасау, еңбек қорғау нұсқаулығы талаптарының орындалуы секілді өрт сөндіру кезінде басты мақсат саналатын қағидалардың орындалуын саралаған жаттығуда Қызылорда өрт сөндіру пойызының сарбаздары кәсіби біліктіліктерін көрсетіп қана қоймай, өзге ұжымдардың құрамаларынан тәжірибе алмаса білді.

Кәсіби дағды – шеберлік

Читайте также

Газета Қазақстан теміржолшысы, №13 от 20 февраля 2026 года