Теңдік станциясының жаңа тынысы ашылды

Новости

02.08.2016, 16:39

Жана жол

Атырау – өндірісті аймақ. Ел экономикасы еңсе түзегелі бері өңірде көптеген істер атқарылуда. Ол темір жол саласын да қамтып отыр. Айталық, күні кеше Атырау іргесіндегі Теңдік станциясын қайта жаңғырту жұмыстары аяқталды. Бұл «Қазақстан темір жолы ҰК» АҚ игілігіне жасалып жатқан жұмыстың бір бөлігі. Бұдан бұрын жазғанымыздай, Атырау жол бөлімшесінде көптен бері айтылып келе жатқан жұмыстар ішінде Ақжайық станциясының «жүгін» жеңілдету ісі өткір тұрған еді. Өңірде «Атырау мұнай өңдеу зауытында айналма темір жол құрылысын салу» жобасы қолға алынғалы бері ол мәселе де оң бағытта шешілетін болды. Зауыттың көлік инфрақұрылымын дамытуға бағытталған жобаға сәйкес оның кірме жолын Теңдік станциясымен жалғау көзделген, сонда Ақжайық станциясы біраз «жеңілдеп» қалады. Аталған жобаны жүзеге асырушы «РТИ-АНПЗ» ЖШС Теңдік станциясының құрылысын аяқтап, теміржолшылар күні қарсаңында толықтай пайдалануға беріп отыр. Серіктестіктің Бас директоры Мұхтар Байжановтың айтып өткеніндей, бүгінгі уақытта Теңдік станциясында соңғы технология бойынша жабдықталған «МПЦ-И» орталықтандырылған басқару пульті орналасқан су жаңа ғимарат бой көтерді (суретте). Оны станцияның әкімшілік кеңсесі десе де болады. Оның іші станция бастығы, станция кезекшісі, оператор, вагон қараушылар, байланысшы, жолшылар, электр энергиясымен қамту, кеден, басқа да қызметкерлер үшін арнайы бөлмелер жабдықталған. Ғимаратқа дербес газ, су, жарық, кәріз жүйелері жүргізілген. Жұмысшылардың еңбек етуіне қолаулы жағдай жасайтын асхана, киім ауыстыратын, жуынатын бөлмелер де бар. Қысты күнгі суықта даладажұмыс істейтін теміржолшылар үшін арнайы жылынатын бөлме де қарастырылған. Станция аумағында жоғары матчталы, биіктігі 25 метрлік 17 дана жарық бағандары орнатылған. Оның әрқайсысында 8 прожектордан бар, сонда барлығы 136 прожектор станцияға жарық беріп тұр! Яғни, олар станцияның самаладай жарқырап тұруына мүмкіндік береді. Басқасын айтпағанда, бұл ең алдымен күні-түні тынымсыз еңбек ететін вагон құрастырушылар үшін қолайлы болмақ. Сондай-ақ, темір жолдың жанынан дыбыс оқшаулағыш қалқа орнатылған. Станция аймағының елді мекен екенін ескерсек, бұл сол маңдағы ауыл тұрғындарын тепловоздың дауысы, вагонның тарсылынан оқшаулайтын қолайлылық. Қалқаның биіктігі 3 метр, ал ұзындығы 500 метр, яғни ауылдың бір шетінен екінші шетіне шейін созылған. Станция басында бұрынғы 2 жолға қосымша жаңа 2, 4, 6-шы 3 қабылдап-жөнелту және вагондарды құрастыратын сегізінші жол салынды. Бұл станцияның өткізу қабілетін бұрынғыдан екі-үш есеге арттырады деген сөз. Магистральды қатынасты есептемегенде, зауыттың өзіне тәулігіне 8 жұп пойыз қабылдап-жөнелтіледі. Станциядағы пойыздар қозғалысы, маневр жұмыстары, вагон қабылдап-жөнелту монитор арқылы автоматты түрде бақыланып отырады. Сонымен қатар, 9 дана бағыттамалы бұрма іске қосылып, олар автоматты түрде ажыратылып, қосылады. Станция басында қуаттылығы 50 киловатт алып дизель генераторы бар ғимарат салынған. Егер жарық сөніп қалған жағдайда, генератор автоматты түрде қосылып, станция жұмысына «жан» бітіреді, жұмыс тоқтамайды. Сондай-ақ, жаңадан 37 бағдаршам орнатылды. Радио, телефон байланысы, станция паркіне таралатын дыбыскүшейткіш, машинистермен байланыстың бәрі соңғы үлгідегі қондырғылар арқылы жабдықталған. Станция аумағы абаттандырылып, асфальт төселіп, жас көшеттер отырғызылған. Осының бәрі теміржолшылар игілігіне ұсынылып отыр. Теміржолшылардың төл мерекесі қарсаңында жұмыс толық аяқталып, жаңарып-жаңғырған станция пайдалануға беріліп отыр.

Теңдік станциясының жаңа тынысы ашылды

Читайте также

Газета Қазақстан теміржолшысы, №63 от 11 августа 2026 года