Цифрландыру – рельс өндірісінде

Новости

16.03.2018, 16:13

2 мин чтения

Ақтөбеге жұмыс бабымен келген ҚР Үкімет басшысының орынбасары Асқар Жұмағалиев өңірдегі инновациялық өндіріс орны рельсарқалық зауытында болып, кәсіпорынға цифрландыру жүйесін енгізу жобасымен танысты. Зауыт басшылығы Үкімет басшысы орынбасары мен облыс әкімі бастаған ресми делегацияның рельс өндірісімен таныстырып, шикізатты жоғары температурада қатты қыздырып, рельс дайын болғанға дейінгі аралықты егжей-тегжей түсіндіріп, іс жүзінде көрсетті. Зауыт құрылтайшыларының бірі Марат Ибрагимов өндірістегі заманауи жаңашылдықтармен, толықтай автоматтандырылған үдеріспен таныстыра келіп, цифрландыру элементтері Ақтөбе рельсарқалық зауытында әлдеқайда енгізілгенін паш етті. Сонымен қатар отандық рельске бүгінде алыс та жақын шет мемлекеттерде сұраныс артып отырғанын, өткен жылдың өзінде көршілес Ресей теміржолдарына Қазақстанның рельстері жөнелтіле бастағанын жеткізді. Қонақтар дайын болған рельс өнімдерін соңғы сатыда тексеретін зертхана жұмысымен де танысып шықты. Мәжіліс залында өткен жиында облыс басшысы Бердібек Сапарбаев өндірісті цифрландыру бағытында жасалып жатқан жұмыстар туралы есеп берді. «Бүгінде Ақтөбе облысында қызмет көрсету, білім беру, ауыл шаруашылығы, денсаулық сақтау, т.б. салаларда цифрландыру жұмыстары белсенді түрде қолға алынып келеді, рельсарқалық зауыты сынды инновациялық өндіріс орындары цифрландыру стандартымен жұмыс істейді. Жалпы, биыл кем дегенде 25 кәсіпорынды қайта жаңғыртып, цифрландыруға 38 млрд теңге бөлуді жоспарлап отырмыз», – деді Бердібек Сапарбаев. Өз кезегінде, Асқар Жұмағалиев Мемлекет басшысының цифрландырудың тиімділігін қарапайым мысалдармен нақтылау қажеттігін атап өтті. Вице-премьер цифрландырудың не үшін керектігіне тоқталды, көптеген оң нәтижеге цифрландырудың арқасында қол жеткізуге болатынын нақты мысал мен болжам арқылы баяндады. «Жалпы, өнеркәсіпті цифрландыру, экономикасының барлық салаларына цифрлы технологияларды енгізу қолға алыну қажет, онсыз өңдеуші кәсіпорындардың өнімділігі мен сапасын арттыру, әлеуетін арттыру мүмкін болмайды», – деп қорытты сөзін Асқар Жұмағалиев.

Цифрландыру – рельс өндірісінде

Читайте также

Сейчас читают