Өндірісте – «бес стандарт» жүйесі

Новости

27.04.2018, 16:23

Семей магистральдық желі бөлімшесі өндірістегі қауіпсіздік мәселесі бойынша жаңа жүйеге көшуде. Биылғы көктемде «ҚТЖ» ҰК» АҚ-ның «Өндірістік қауіпсіздікті жүргізу жүйесінің стандарттары» хаттамасы аясында ілкімді шаралар қолға алынған болатын. Еңбекті қорғау инженерлері арасында жалпақ тілмен «Бес стандарт» деп аталатын жаңашылдық қазіргі күннің өзінде тиімділігін дәлелдеп үлгерген. Өндіріс барысында қауіпсіз жұмыс жүргізудің бүге-шігесін толық қамтитын аталмыш жаңа стандарттар бойынша әуелгі кезекте түсіндіру жұмыстары жүргізілген болатын. Бұл ретте бөлімшенің инженерлері Астана қаласындағы арнайы біліктілік шыңдау курстарында болып, тәжірибе жинап қайтқан еді. – Алдымен теміржолшылардың мол шоғыры орналасқан Аягөз қаласында техикалық дәріс өткізіп, таныстыру рәсімін жасадық. Семей магистральдық желі бөлімшесіне қарасты барлық мекемелер өкілдері қатысқан жиында слайд бойынша кеңінен түсіндіру шарасы өткізілді. Өндірістік қауіпсіздікті жүргізу жүйесінің негізгі бес стандарты бар. Оның ішінде жаңадан енгізілген экологиялық қауіптіліктің негізгі аспектілері, мінез-құлық бойынша диалог жүргізу, төтенше жағдай кезіндегі сақтандыру сынды жаңа стандарттар жөнінде толық мағлұмат бердік. Мұның сыртында өндірістік апат және өрт қаупі туындаған сәттегі әрекет сынды жекелеген тараулар да дәріс барысында өтілді, – дейді НЖС-6 мекемесінің еңбекті қорғау бөлімінің аға инженері Жомарт Шапишев. Мамандардың айтуынша, жаңа жүйенің жұмыс жүргізудегі тиімділігі зор. Мәселен, әрбір теміржолшының кәсіби дағдысы ғана емес, мінез-құлқы да еңбекті қорғау инженерлері тарапынан ескерілетін болады. Сондай-ақ, өндіріс барысында жіберілген ақаулықты анықтау, зерттеу қорытындысында бұрындары жауапты адам жазаланса, ендігі аралықта кінәраттың шығу себебі нақтыланып, оның алдын алу шаралары алға қойылады. Қазіргі күні Семей магистральдық желі бөлімшесі қызметкерлері «бес стандарт» жүйесі бойынша жұмыс істеу тәсіліне толық көшті. Ал, оның нақты тиімділігі алдағы қорытынды көрсеткіштер барысында толық анықталатын болады. Қуаныш Қожаев, Семей

Өндірісте – «бес стандарт» жүйесі

Читайте также

Газета Қазақстан теміржолшысы, №47 от 19 июня 2026 года