Экологиялық айлық жүруде

Новости

25.05.2018, 13:03

Ел шығысындағы теміржолшылар үшін көктемгі тазалық айлығы қызу жүріп жатыр. Осы орайда сала мамандары сенбіліктер шараларын өткізуге бағытталған экологиялық айлықты бастап кетті. Өткен сенбі күні барша қызметкерлер күш жұмылдырып, тағы да сенбілікке шықты. Айта кетерлігі сол, санитарлық жұмыстар тек теміржол мекемелері маңына ғана емес, қала ішімен өтетін желі бойында да жүргізілді. Теміржолшыларды сенбілік жұмыстарына бөлімше басшылары бастап шықты. Қызу кіріскен олар қала ішін көктей өтетін желі бойындағы қыстан қалған тұрмыстық қалдықтар мен қураған бұталарды бір күн ішінде толық тазартып шықты. Негізінен желінің қос қапталы – жеке тұрғын үй секторлары. Күл-қоқысты теміржол бойына әкеліп төгетін тұрғындарға тыйым болмай тұр. Шағын күлтөкпеге айналған қоқыс үйінділерін тазартуға аз күш жұмылдырылған жоқ. Атап айтсақ, ПЧ-39 мекемесіне қарасты қала орталығындағы теміржол көпірінен бастап, Қабанбай-2 жол өткеліне дейінгі аралықта Семей жол дистанциясының қызметкерлері жұмыс істеді. Бұл шаһар ішіндегі ең күрделі аумақ. Себебі, Шығыс өңірі бойынша ең ірі көтерме сауда базарлары осы маңайда орын тепкендіктен әрі жаяу жүргіншілер өткелдері көп болғандықтан ластану мөлшері жоғары. Сол себепті де, қалалық мәслихат депутаты, бөлімше басшысы Марлен Көкірекбаевтың бастамасымен ерекше шара қолға алынды. Аталмыш мәселеге жергілікті муниципалды полиция өкілдерінен 60 адам тартылып, желі бойын күлтөкпеге айналдырған барлық жауапсыз тұрғындарға тегіс 30 АЕК көлемінде айыппұл салынып шықты. Мәлім болғандай, олардың ешбірінде қоқыс шығаратын мекемелермен келісім-шарт болмаған. Ал, биылғы жылы сенбілік жұмыстары біршама оңтайластырылды. Себебі, санитарлық тазалық шараларына қажетті техника, жанармай қалалық әкімдіктің ТҮКШ бөлімі тарапынан бөлінген болатын. Сенбілік шаралары әсіресе көктемгі су тасқыны орын алған Аягөз қаласында да жоғары деңгейде өткізілді. Соңғы екі апта ішінде Аягөз және Семей шаһарында 400-ден аса теміржолшы жұмыс жасап, тазалық жүргізіп шықты. Бұл бағыттағы жұмыстар ендігі аралықта көгалдандыру, абаттандыру шараларымен жалғаспақ.

Экологиялық айлық жүруде

Читайте также

Газета Қазақстан теміржолшысы, №46 от 16 июня 2026 года