Асыра сілтеу болмасын

Қызмет бабын асыра пайдаланып, сыбайлас жемқорлық фактілеріне жол бермеу, парақорлыққа тосқауыл қою теміржол саласы қызметкерлері үшін де өзекті болып отыр. Өйткені, аталмыш тарапта көлеңкелі көріністердің салада да ішінара орын алып жататыны жасырын емес. Бұл ретте қоғамдық қырағылықты күшейтіп, қызметкерлер арасында құқықтық сауаттылықты арттырудың маңыздылығы зор. Осынау жайт Семей ЖТ бөлімшесіндегі антикоррупциялық кеңестің дөңгелек үстелінде кеңінен айтылды. Басқосуға негізінен желі бойындағы салалық мекемелер басшылары, қатардағы теміржолшылар, арнайы органдар өкілдері қатысты. Жиынды кеңес мүшесі Семей магистральдық желі бөлімшесінің басшысы Айдын Шәукежанов ашып, отырыстың өзектілігіне тоқталып өтті. Сыбайлас жемқорлық көріністеріне нөлдік төзбеушілік мәселесі бойынша бөлімше көлеміндегі атқарылған шаралар ретін де сөз етті. Ал, келесі сөз кезегін алған аймақаралық антикоррупциялық басқарманың Семей өңірі бойынша жетекшісі Ғалымжан Қошқарбаев қазіргі таңдағы жемқорлық көріністерінің түрлеріне кеңінен тоқталды. Бұл қоғамдық дерт білім беру, денсаулық сақтау, т.б. салаларда жиі кездеседі екен. Қуантарлығы сол, теміржолшылар аталмыш фактілер бойынша қарқынды күрес жүргізу нәтижесінде болар, қара тізімде жоқ. Десек те, «бес саусақ бірдей емес» демекші, ұжымның жемісті де жетістікті істеріне нұқсан келтіріп, «бармақ басты, көз қыстылық» арқылы оңай табыс тапқысы келетіндер де кезігіп қалып жатады. Мұндай көріністер арасында әсіресе «сыйақы» алып, жұмысқа орналастырамын деген өтірік уәде беруші алаяқтар ісін ерекшелеп атауға болады. Жиын барысында жемқорлық кесірінен бостандығы шектелген жандардың өкініші мен аталмыш бағыттағы жүргізіліп жатқан қарқынды күрес жайын сөз ететін деректі бейнефильм көрсетілді. Айта кету керек, бүгінде Семей ЖТ бөлімшесі бойынша коррупциялық нышаны бар әрекеттерге жол бермеу мақсатында арнайы сенім телефоны және «Semtemirzhol@mail.ru» электронды поштасы тұрақты түрде жұмыс істеуде.   Қуаныш Қожаев, Семей