Вокзал аумағы кеңейтілмек

Новости

23.09.2016, 11:23

2 мин чтения

Маңғышлақ станциясы, яғни Маңғыстау ауылының биылғы 50 жылдығына орай станцияның вокзал аумағын үлкейту жобасы жасалды. Бүгінде 250-300 көлікке арналған қосымша тұрақтың құрылысы жүруде. Ол биыл қыркүйектің аяғына дейін дайын болады. Қазыналы түбектің «қара алтыны» игерілуіне байланысты өңірге теңіз бен түзді байланыстыратын темір жолының келуімен бой көтере бастаған бастапқы ғимараттардың бірі – вокзал үйі. Сол жылдардағы қажеттілікке шақтап салынған нысан кейіннен кеңейтіліп, қазіргі екі жағындағы «қос қанаты» қосылған болатын. Бірақ ғимараттың алдындағы автотұрақ жолаушыларды шығарып салып, күтіп алушы көліктерге тарлық қылатын. Соның салдарынан вокзалдың алдындағы жолда кептеліс қалыптасып, «темір тұлпарлардың» кіріп-шығуы қиындай түсетін. Аталған мәселе биыл станцияның 50 жылдық мерейтойы қарсаңында өз шешімін таппақ. Осы жөнінде темір жол вокзалы орналасқан аудан – Мұнайлы ауданы әкімінің орынбасары Нұрлыбек Жолбаев: «Облыс орталығына темір жол арқылы кіретін жалғыз қақпа осы елді мекенде орналасқандықтан мерейтой аясында қолға алынып жатқан іс-шаралардың ішінде темір жол вокзалының аумағын кеңейту жұмысы да бар. Нысан бұдан біраз жыл бұрын салынғандықтан вокзалға келетін көліктер автотұраққа сыймай, кейбір жүргізушілер «темір тұлпарларын» көпқабатты үйлердің маңына қалдыруға мәжбүр болатын. Содан соң вокзалдың алдына көлік кірмейтіндей қылып, басқа да жоспарларымызбен темір жол жолаушыларының жүріп-тұруына оңтайлы жағдай жасамақпыз. Сонымен қатар жолаушылардың деген жеріне кідіріссіз жетуі үшін өткен тамыз айының соңында ауылдағы темір жол өткелі жанынан айналма жол салып, қолданысқа бердік», – дейді. Бұл жұмыстар «Маңғыстау ауылындағы темір жол вокзалы маңын абаттандыру және автокөлік тұрағын кеңейту, айналма жол салу» жобасына бөлінген қаражат негізінде жүзеге асуда. Маңғыстау вокзалының бастығы Людмила Нұрмамедованың айтуынша, вокзалмен күніне орта есеппен 1800-1900-ға жуық адам діттеген жеріне жол алады. Жолаушылардың жүру белсенділігі негізінен мамыр-қыркүйек айлары аралығында байқалады. Оларға вокзал аумағында жолаушылар тасымалының үш, жеке кәсіпкерлердің төрт кассасы қызмет көрсетеді.

Вокзал аумағы кеңейтілмек

Читайте также

Сейчас читают