Ережелерді қатаң сақтауға дағдыланған

Новости

03.11.2016, 15:59

Маңғыстау вагон пайдалану депосының қылышын сүйрете жететін «кәрі құданы» қарсы алуға «бес қаруы» сайлаулы. Жұмысшылар қыстық киім-кешек, жұмысқа қажетті құрал-сайман, басқа да ұсақ-түйекпен түгел қамтамасыз етілді. Кәсіпорынның қытымыр қысқа даярлығы, жұмыс ережелері мен нұсқаулықтары, еңбек қауіпсіздігі жайлы әңгімелеген депо директорының орынбасары Майлыбай Камаловтың мәліметінше, жыл басынан бері 356 вагон ағымдағы жөндеуден өткен. Бұл өткен жылдың тиісті мерзімімен салыстырғанда 70-ке артық. Сонымен қатар жалпы 825 885 вагон тексерістен өткізіліп, оның ішінде 705 083 жүк вагонын, 120 802 жолаушылар вагонын құраған. Жүк тиеуге берілген 33 555 вагон бақылаудан өткен. Сонымен қатар, көтеру механизмдері мен кран балкала, тарту құрылғылары сынды техникалар күтіміне аса көңіл бөлініп, жоспарлы-профилактикалық жұмыс бойынша «Еңбек қауіпсіздігі күндері» үздіксіз жүргізіледі. Ең бастысы, депо басшысының айтуынша, теміржолшылар бекітілген жұмыс ережелерінен аттап өткен емес. Мәселен, мекемедегі жас мамандарға дейін жұмыс уақытында алаңдауға, ұялы телефонмен сөйлесуге, музыка тыңдап, ойларын сан-саққа жүгіртуге болмайтындығын, тапсырылған жұмыс уақытылы жасалуы тиістігін жақсы біледі және қатаң сақтайды. ─ Бізде еңбек қауіпсіздігі мен еңбек қорғау талаптары күнделікті қатар жүреді. Жұмысшы-қызметкерлер соған әбден жаттыққан. Мысалы,суық күндері бой жылытатын жұмысшылар бөлмесі шағын ғана болғанымен, онда қажетті нұсқаулықтар мен ескерулер ілініп, еңбек қорғау бұрышымен қамтылған. Төргі бұрышта жарақаттанушылыққа жол бермеудің он түрлі ережесі көрсетілген. Мысалы, нұсқаулық алмай жұмысқа кіріспеу, арнайы киімсіз, бұзылған құрал-саймандармен жұмыс істемеу, жеке қорғану киімін киюді ұмытпау, жұмыс орнын ластамау, тағысын тағы ережелер жазулы тұр. Тәртіптің мықтылығынан айналамыз таза, тастанды, тұрмыстық қалдықтармен бүлінбеген, – дейді Майлыбай Камалов. Маңғыстаулық вагоншылардың техникалық пайдалану ережелерін қатаң сақтауға дағдылануы нәтижесіз емес, соңғы жылдары өндірісте бірде-бір бақытсыз оқиғаға жол берілмеген.

Ережелерді қатаң сақтауға дағдыланған

Читайте также

Газета Қазақстан теміржолшысы, №46 от 16 июня 2026 года