Жанболаттың олжасы

Новости

10.01.2017, 12:02

2 мин чтения

Өткен жылдың соңында Павлодарда «Жыл машинисі» сайысы өтіп, әр аймақтан ат терлете барған 30 машинистің білім сайысында бақ сынасқаны белгілі. Байқау мақсаты – өз кәсібінде жақсы нәтижеге қол жеткізіп, темір жол көлігінің тиімділігін арттырып, пойыздар қозғалысы қауіпсіздігін қамтамасыз етуге белсенді атсалысып жүрген машинистерді анықтау болды. Байқауға Маңғыстау пайдалану локомотив депосының үшінші сыныпты тепловоз машинисі Жанболат Жолмағанбетов те қатысу құрметіне ие болды. ─ Байқау шарттарына сай ұсынылған тапсырма күрделі болды дей алмаймын. Өйткені, өзімнің күнделікті жұмысымда осындай тапсырмалармен бетпе-бет келетін кездерім болады. Алайда, бір сұрақта бірнеше дұрыс жауаптың кездесуіне аздап шатасқанымды кеш түсіндім, – деді сайыста «ҚТЖ-Жүк тасымалы» АҚ президенті О.Кулаковтың Алғыс хатымен марапатталған Жанболат Мұңалбайұлы. Бәрінен де ұтқандары, байқау барысында басқа да өңірлерден келген әріптестерімен танысып, екі күн бойы барлығы бірге болып, қаланың көрікті жерлерін аралағанымыз болды деп санайды маңғыстаулық машинист. «Тап бір машинистер съезінде болғандай әсермен оралдым елге» дейді. Байқауда тест сұрақтарының нұсқалары компьютерде құрылып, тестілеу аяқталғанда компьютер тесттің нәтижесін автоматты түрде есептеп шығарған. Нәтижесінде 90 балдан жоғары ұпай жинаған Алматы, Семей, Екібастұз, Бурабай курорты, Жамбыл деполарының қызметкерлері финалға өтіп, 15 қараша күні жарысты одан әрі жалғастырған. Қорытынды есепте I орынды Жамбыл, II орынды Семей, III орынды Бурабай курорты локомотив пайдалану деполарының машинистері иемденіп, жүлдегерлерге өтпелі кубок, бағалы сыйлықтар мен ақшалай сыйлықтар табысталыпты. Маңғыстаулық машинист Жанболат осындай ауқымды шараға қатысудың өзі жеңіс, үлкен олжа деп санайды.

Жанболаттың олжасы

Читайте также

Сейчас читают