Табиғат аясындағы демалыс

Жамбыл жол бөлімшесінің қызметкерлері мамыр мерекелерін тамаша пайдалана білді. Жол бөлімшесінің әкімшілік қызметкерлері және жедел басқару бөлімінің мамандары Тараз қаласының іргесіндегі Жасөркен ауылының жанынан ағып жатқан Аса өзенінің бойында, табиғат аясында демалыс ұйымдастырды. – Мереке күндері әрі демалыс, әрі саламатты өмір салтын қалыптастыру мақсатында осындай демалыс ұйымдастырып, күнделікті жұмыстан қажыған мамандарымызды бір сергітуді ойладық. Әкімшілік және жедел басқару бөлімінің арасында спорттың он түрі бойынша жарыс ұйымдастырылды, – дейді Жамбыл жол бөлімшесінің директоры Дәулетбай Есімбеков. Табиғат аясындағы денмалыс теміржолшылардың спортқа деген құлшынысын арттыра түскен, әрқайсысы өз командаларына ұпай жинауға тырысты.  Ерлер арасында 60 метр қашықтыққа жүгіруде бірінші орынды жедел басқару бөлімінің маманы Мамед Шилімбетов иеленіп желаяқтығын дәлелдесе, келесі екінші орыннан әкімшілік қызметкері Мейрамбек Жұматаев, үшінші орыннан жедел басқару бөлімінің маманы Бауыржан Ұстаев көрінді. Сондай-ақ, қыздар арасындағы 50 метр қашықтыққа жүгіруден әкімшілік қыздары алдына жан салмады. Жүлделі бірінші орын Айтолқын Жайлаубаеваға, екінші орын Гүлжан Ақшораеваға, үшінші орын Юлия Сотниковаға бұйырды. Волейболдан әкімшілік командасының мерейі үстем болды. Шағын футболдан да әкімшілік қызметкерлері алдына жан салмаса, арқан тартуда олар жедел басқару бөлімінің қызметкерлеріне есе жіберіп қойды. Кір тасын көтеруде жедел басқару бөлімінің қызметкерлері Ербол Мырзалиев бірінші, Талғат Сапарбеков екінші, әкімшілік қызметкері Азамат Досжанов үшінші орынды қанжығалады. Үстел теннисінде Жамбыл жол бөлімшесінің директоры Дәулетбай Есімбеков бірінші, Жамбыл облысы әкімдігінің қызметкері Қыдыр Бегалиев екінші және жол бөлімшесінің қызметкері Болат Абдуов үшінші орынды иеленді. Нардыда Мейрамбек Серікбаев бірінші, Асылхан Тайлақбаев екінші, Асқар Әлімбаев үшінші орыннан көрінді. Сөйтіп, табиғат аясындағы демалысын қызықты өткізген әулиеаталық теміржолшылар бір серігіп қалды.

Ерман Әбдиев, Жамбыл