Кәсібилік – қауіпсіздік кепілі

Социум

24.08.2016, 12:06

2 мин чтения

Теміржолшы біліктілігі, маманның кәсіби де техникалық сауатты болуы – қызмет барысындағы қауіпсіздік негізі. Бұл қағида Семей жол бөлімшесінде де басты ұстаным саналады. Қозғалыс қауіпсіздігі мен еңбекті қорғау шараларын жетілдіру аясында сала мамандарының тәжірибесін арттыру, біліктіліктерін шыңдау ісі бірінші кезекте жолға қойылған. Бөлімше бойынша әсіресе станция қызметкерлерінің кәсібилігіне баса көңіл бөлінген. Қызметтік ережелер мен қауіпсіздік және еңбекті қорғау инструкциясын үздік меңгерген қозғалысшы ғана талап үдесінен шыға алады. Ал бұл бағыттағы шаралар жылма-жыл үзіліссіз жүргізіледі. Соның ішінде теміржолшыларды кәсіби тұрғыдан оқыту, біліктіліктерін жетілдіру бағытындағы жұмыстарды айрықша атап өтуге болады. Мәселен, ағымдағы жылдың алты айының ішінде республикадағы теміржолшыларды қайта оқыту орталықтарына 11 маман білімін жетілдірген екен. Ал осынау мерзім ішінде Астана қаласындағы көлік технологиялары орталығында 4 адам арнайы біліктілік жоғарылату курсынан өтіп қайтыпты. Тек қатардағы теміржолшының кәсіби болуы аздық етеді. Қозғалыс барысын ұйымдастырушы, үдерісті қадағалаушы басты тұлға станция бастығының да біліктілігі жоғары болуы міндет. Биылғы жылы екі станция бастығы, бір станцияның инженер-технологы мен бөлім бастығының орынбасары Елордадағы оқу орталығында біліктілігін шыңдап, кәсібилік қырын дамытып қайтты. Бұл сөз жоқ, еңбектегі жетістікке де оң әсер ететіні анық, – дейді Семей жүк тасымалдау бөлімшесінің кадр бөлімінің басшысы Шалқар Мусаинов. Жалпы, қазіргі күні станция қызметкерлеріне қойылатын талап қатаң. Сондықтан болар, бөлімше бойынша түрлі байқаулар мен ойын түріндегі техникалық дәрістер жиі өткізіледі. Басты тақырып ретінде қауіпті өндірістік факторлар, станциядағы габаритті емес орындарды санамалап шығу, локальды актілер жайлы сөз қозғалады. Мұндай байқауларда теміржолшының кәсіби білімінің деңгейі ғана емес, жұмыс орнын даярлау, қызмет барысындағы өзін-өзі ұстау мәдениеті, өндіріс барысындағы үдерістерден қаншалықты хабардар екендігі де сарапқа түсуде. Бұл шаралардың барлығы да өз кезегінде станция қызметкерлерінің кәсібилігін жоғарылата түспек.

Кәсібилік – қауіпсіздік кепілі

Читайте также

Сейчас читают