Спорт күнін өткізді

Социум

26.08.2016, 17:09

Еліміз бойынша жыл сайын тамыз айында спорт күні атап өтілетіні белгілі. Осыған орай «Нұр Отан» партиясы «Теміржол» филиалының ұйымдастыруымен Қызылорда бөлімшесінде «Салауатты ұлт – салауатты ұрпақ» тақырыбында үстел теннисі, шахмат, дартс, ерлер арасында кір тасын көтеру секілді спорттың төрт түрінен жарыс өтті. Бөлімшенің 8 бөлімінен 20-ға жуық теміржолшы қатысқан спорттық сайыстар тосынсыйға толы тартысты да қызықты өткені сонша, бұрын-соңды танылмаған талай теміржолшының бағын ашты. Ойшылдар ойыны шахмат сайысында ең мықты деген шахматшылар өзара сынға түсіп, бұрыннан бері жеңіс туын қолдан бермей келе жатқан кәнігі шахматшыларды жастардың ығыстырып шығарған сәттеріне куә болды көпшілік. Нәтижесінде НЖС-10 мекемесінің жетекші есепшісі Н. Нұрмұратова «Үздік шахматшы» номинациясын жеңіп алды. Бұдан кейінгі кезекте үстел теннисінен сайыс өтті. Бұл жарыста НЖС-10 экономисі А. Даулетбаева мен ЛОИС инженері М. Быдықбаева «Үздік теннисші» жүлдесін еншілесе, кір тасын көтеруден НОД-10 автокөлік жүргізушісі А. Дүзелбаев үздік деп танылды. Көздеу бойынша НЖС-10 хатшысы А. Тұрсын «Үздік мерген» атанды. Қызылорда бөлімшесінің дене тәрбиесі және спорт бөлімінің аға нұсқаушысы Бақытжан Имбергенов «Қазақстан темір жолы» компаниясы спорттық сауықтыру шараларын өткізуді үнемі қолдап келетінін сөз етті. Жыл сайын мерекелік күндері дәстүрлі түрде бөлімше бойынша әртүрлі спорттық іс шаралар өткізіліп отырғанын және жақында ғана өткен облыс әкімінің жүлдесіне арналған спартакиадада «Теміржол» командасы шахматтан II орынды, үстел теннисі мен волейболдан III орынды жеңіп алғанын айтып, аймақ теміржолшыларының спотттық бәсекелерде жүлделі орындардан көрініп жүргендігін білдірді. Жарысты ұйымдастыруға мұрындық болған «Нұр Отан» партиясы «Теміржол» филиалы төрағасының бірінші орынбасары Базара Танбаева спорттың адам денсаулығын нығайтумен қатар ойлау қабілетін арттыруға қызмет ететінін айтып, сала қызметкерлерін салауатты өмір салтын ұстануға шақырды. Жеңімпаздарға «Нұр Отан» партиясы «Теміржол» филиалы төрағасының алғыс хаты мен кубоктар табыстады.

Спорт күнін өткізді

Читайте также