Отбасы құндылықтары ұлықталды

Социум

09.09.2016, 17:12

2 мин чтения

Қазақстан Республикасы Тәуелсіздігінің 25 жылдығы қарсаңында Қызылорда жүк тасымалдау бөлімшесінде Отбасы күні құрметіне аймақ теміржолшыларының арасында «Ең үздік отбасы» сайысы өтті. Жас теміржолшылардың отбасы қатысқан жарыста алты жұп жүлдені өзара сарапқа салды. Таныстыру, отбасылық құндылықтарды қастерлеу және әр отбасы өз өнерін көрсету сынды үш түрлі турдан тұратын отбасылар сайысына жасы отыздан аспаған теміржолшылар жанұясы іріктеліп, қазақтың отбасы қандай болу керек деген тақырыпта бақ сынасты. Үй тапсырмасы ретінде жанұя мүшелері салған суреттер көрмесін әзірлеген отбасылар ішінде Қызылорда магистральдық желі бөлімшесінің теміржолшысы Әбдіқалиевтер шаңырағының отанасы Мөлдір Ақышеваның өнері көрермендерді тәнті еткені байқалды. Өз өнерін көрсету сайысында алдына жан салмаған Құрманғазиевтер отбасының отағасы Рүстем де талай мәрте жастар арасындағы додаларға түсіп жүрген жүйрік екендігін тағы бір дәлелдеп, жиналғандардың алғысына бөленді. Жарысқа қатысушы отбасылардың арнайы дайындаған отбасылық слайдын мультимедиялық экраннан тамашалаған қазылар алғашқы турды ашқан бөлімше қызметкері Алмағанбетовтер отбасына «Ынтымақты отбасы» номинациясын берсе, Ірілендірілген Қызылорда жол дистанция ұжымынан қатысқан Уайысовтар отбасы «Жарасымды жанұя» аталымын иеленіп, Жолаушылар вагондарын жөндеу депосы мекемесінің үмітін үкілеген Барысовтар жанұясы «Мерейлі отбасы» атанды. Ал негізгі жүлдеге ие болғандарға тоқталсақ, отбасылық құндылықтарды насихаттау мақсатында үш турды да еңсерген жас отбасылар арасынан жүлделі 3 орынды Локомотив пайдалану депосынан Асанхановтар отбасы иеленіп, «Үлгілі отбасы» номинациясын алды. 2 орыннан көрінген Құрманғазиевтер жанұясы «Өнерлі отбасы» номинациясына ие болса, «Ең үздік отбасы» номинациясымен бас жүлдені жеңіп алған Әбдіқалиевтар отбасы баршаның сүйіспеншілігі мен құрметіне бөленді. Қоғамдағы оғаш әрекеттен қорған болған отбасының жылуын алтын бесікке балаған сайыс қатысушылары еліміздегі отбасы ынтымағы арта берсін, ошақ жылуы тарқамасын, оттың шуағы түзу тарасын деген ниет ұстанған байқауға қатысушылар «тілек шамын» жағып, бір-бірлеріне игі тілектерін арнады. Әр тур арасындағы үзілісті ырғақты ән, сырлы сазбен өрнектеген аймақ теміржолшылары көрермендердің көңілін тауып, зор қошеметке ие болды. Байқауды ұйымдастыруға мұрындық болған «Нұр Отан» партиясы «Теміржол» филиалы мен Облыстық «Жас Отан» жастар қанаты филиалы өкілдері жеңімпаздарды Алғыс хат пен арнайы сыйлықтармен марапаттады.

Отбасы құндылықтары ұлықталды

Читайте также

Сейчас читают