Қас-қағым сәтте өткен қырық жыл...

Новости

24.01.2017, 13:39

3 мин чтения

Атырау станциясының құжаттарды реттеу бөлімінің басшысы Сара Төлеуішованың саладағы еңбек өтіліне биыл 40 жыл толады екен. Еңбек жолын 1977 жылдың желтоқсан айында Атырау станциясында құжаттарды өңдеу операторы болып бастаған. Сара Мисалқызы көзді ашып жұмғандай уақыт ішінде қырық жыл өткеніне сенер-сенбесін білмейді. «Апырау, бәрі күні кеше ғана сияқты еді, осы станцияға тосырқай да жатырқай именіп келгенім, біраз күн үйренісе алмай жүргенім, кейін туған үйімдей, сосын төркінімдей болып бауыр басып кеткенім...» деп өткен күнді сағынышпен еске алады апай. Биыл алла қаласа зейнеткерлік жасына келуіне байланысты құрметті еңбек демалысына шығады. Қарабатан бекетіндегі теміржолшылар отбасында дүниеге келген Сара Мисалқызы мектеп бітірген соң Ақтөбедегі көлік және коммуникация колледжін «Теміржол көлігінде тасымалды ұйымдастыру және қозғалысты басқару» мамандығы бойынша тәмамдап шығады. Атырау станциясында құжаттарды өңдеу операторлығынан бөлім бастығына дейін көтерілді. Бір орында, бір жерде қырық жыл еңбек етті. Қаншама шәкірт тәрбиеледі. Шәкірт демекші, Сара Мисалқызының қарамағында екі қызметкері де өзі баулып өсірген мамандар. Олардың да еңбек өтілі аз емес: құжат тасымалдарын өңдеуші аға операторы Жанна Қисметованың еңбек өтілі 27 жылға жуықтап қалса, вагондарды есепке алу операторы Алтын Тастемірдің осы салаға бетбұрғанына биыл 38 жыл толады. Әр келіп- кеткен вагондағы жүктің құжаттарының дұрыс болуы осы нәзік жандылардың жауапкершілігінде. Сол себепті өздеріне міндеттелген жұмысты олар жақсы түсінеді. - Бізге жүктелген міндеттің жауапкершілігі сонда- вагон жүктері құжатының қалып қоймай өзімен бірге жөнелтілуі, тіпті вагонның нөмірлері сол құжатта қате кетпеуі тиіс. Өйткені, бір ғана саннан кеткен қате бірнеше қиындық пен кедергіге соқтыратынын біз жақсы білеміз,- дейді қырық жылдық тәжірибесіне сүйенген маман. Сара Мисалқызының теміржолшы болуы әу баста тағдыр маңдайына жазған сый болмса керек. Себебі, әкесі мен нағашылары осы салада ұзақ жылдар еңбек еткен белгілі жандар. Әкесі Мисалды Төлеуішов Қарабатан станциясында отыз жыл жол шебері болса, анасы Наташа Әминова көп жылдар Ақтөбе- Маңғышлақ пойызында жолсерік болыпты. Ал нағашы ағасы - Еділ Исағалиев болса, елге танымал теміржолшы болған жан, одан тараған ұрпақтар бүгінде Ақтөбе және Атырау темір жолында еңбек етуде. Кейіпкеріміз өмірлік серігі Болат Қуановпен осы Атырау станциясына жұмысқа тұрғанда танысқан. Ол кезде Атырау темір жол техникумын тәмамдаған Болат аға Атырау сигнализация, белгі беру және байланыс дистанциясына механик болып жұмыс істей бастаған жас жігіт екен. Тағдырлары тоғысқан екі жас шаңырақ көтеріп, үш ұл тәрбиелеп өсіреді, бүгінде жеті немеренің атасы мен әжесі.

Қас-қағым сәтте өткен қырық жыл...

Читайте также

Сейчас читают