Шар станциясының мәртебесі өсті

Новости

07.02.2017, 15:14

Семей жүк тасымалы бөлімшесіне қарасты Шар станциясының статусы өсіп, 2-ші класқа жоғарылатылды. Оған себеп, мұндағы атқарылатын жұмыстардың ауқымдылығы болып отыр. Сәйкесінше, Шар – Семей, Шар – Ақтоғай және Шар – Защита бойынша үш бағытта жұмыс істейтін жергілікті теміржолшылар үшін қызмет қарқыны да еселей түскен.Станция қызметкерлері өткен жылды табысты қорытындылады. Берілген жоспарлы шаралардың барлығы да жоғары көрсеткішпен орындалды. Маневрлік жұмыстар барысында, еңбекті қорғауда ақаулықтарға жол берілген жоқ. –Қазіргі күні станция бойынша бірінші кезекте жүк түсіру жұмыстарына басымдық беріледі. Бұл орайда жылдың басы болса да станция бойынша тасымал қарқыны мүлде саябырлаған жоқ. Қазіргі күні жоғары көлемде қарастырғанда тәулігіне 15 жұп жүк пойызы өтеді, – дейді Шар станциясының бастығы, әйгілі Мұсабаевтар династиясының өкілі Мұхаметқали Кәукенұлы. Өңірдегі іргелі мекемелер «Бүркіт» ЖШС мен «Бақыршық» тау-кен кәсіпорны тұрақты клиенттер арасында басты клиент саналады. Мәселен, қаладағы осындай бір ғана кәсіпорынға күніне 40-қа жуық цистерналар жөнелтілетінін ескерсек, жұмыстың ауқымдылығын аңғаруға болады. Қазіргі күні шарлықтар логистикаға басымдық беріп, «ҚТЖ Expressпен» бірлесіп жұмыс істеуге көшкен. Бұл ретте жүк тасымалы бойынша арнайы жоспарлы шаралар қабылданған болатын. Соның аясында алдағы уақыттарда клиенттер санының артуына байланысты жүк түсіру жұмыстары арта түседі деп межеленуде. Станция басындағы жиналған вагондар орнында ағытылып, тіркеп, жөнелтіледі. Бұл орайда станцияның 5 пойыз құрастырушысы үлгеріп, өнімді еңбек етуде. Жалпы станцияда 51 адам еңбек етеді. Шардың ауа-райы қатаң. Қарлы боран мен аязды күндері станция қызметкерлері тәулік бойы шұғыл жұмыс жасауға көшіріледі. Себебі, пойыз қозғалысын кідіртуге болмайды. Бүгінде станциялықтар жолшылармен бірге қармен күрес жұмысына жұмылған.

Шар станциясының мәртебесі өсті

Читайте также