Тасқынға тосқын – бүгіннен

Новости

10.02.2017, 11:00

2 мин чтения

Биылғы қыс Шығыс өңірге біршама қиындықтар туғызып тұр. Қар жылдағы мөлшерден тым көп түсті. Сондай-ақ, қарлы боран да теміржолшыларды күнделікті жұмыс ырғағынан жиі жаңылдыруда. Қазіргі күні Жаңасемей жол дистанциясы қызмет көрсететін желі бойында әсіресе жолшылардың еңбегі қауырт. Семей мен Жарма станциялары аралығын қамтитын ПЧ-40 жол дистанциясына тиесілі телім бойынша көктемгі қызыл судың алдын алуға байланысты шаралар қарқын алуда. Ол әрине, алдымен қар шығарумен байланысты жұмыстар. Жалпы, дистанцияға қарасты 239,3 км бас жолдың 74,5 километрі қар басып қалатын қауіпті аймаққа жатады екен. Жол дистанциясының жолшылары телімнің осы бөлігінің қарын тазалауға күш салып жатыр. Жаңасемей жол дистанциясының иелігінде 9 бірлік қар тазалағыш техникалар бар. Оның жетеуі СДПМ болса, қалған екеуі қар тазалағыш СМ-2 мен СМ-7 машиналары. Бұл техникаларда қазіргі күн еш тыным жоқ. Тек станция басында ғана бригада ауысқанымен техникалар тәулік бойы жұмыс істеуде. Соның нәтижесінде, желтоқсанның 1-нен ақпанның 7-сі аралығында қармен күрес бойынша ауқымды шаралар жүзеге асты. Мәселен, СДПМ көлігі 1273 км телім бойын тазалаған. Сондай-ақ, қасаттанған қарды қыратын СС-3 машинасы сегіз мәрте желі бойына шығып, 50 км желі аумағын техникалық талапқа сай еткен. Ал СМ-2, СМ-7 машиналарымен тек станциялық жолдардың өзінен ғана 31 мың текше метр қар шығарылыпты. –Көктемгі қызыл судың алдын алуға байланысты шаралар науқандық тұрғыдан қармен күрес түрінде қарқын алуда. Әсіресе, ақпан айының алғашқы тәуліктерінде қар толассыз жауғандықтан күшейтілген режимде жұмыс жасап, жұмыла кірісуге тура келді. Қазіргі күні бұл іске дистанцияға қарасты 157 жолшы толық жұмылдырылған. Сондай-ақ, станциялық жолдар мен бағыттамалы бұрмаларды қардан тазарту мақсатында 6 рет кең көлемді қар сенбілігі өткізілді. Оған құрама қызмет өкілдері, яғни, ЭЧ-18, ШЧ-29, ВЧДЭ-23 және Жаңасемей станциясының теміржолшылары да қатысты. Қар сенбілігінің нәтижесінде барлығы 24 платформа бойынша екі жүзден аса теміржолшы жұмыла жұмыс істеп, 2 мың текше метр қар шығарылды. Мұндай шаралар әлі де жалғасады, – дейді жол дистанциясының техникалық бөлімінің басшысы Ғафур Рахымбаев. Айта кетерлігі, дистанция қызмет көрсететін бір бағытты телім бойында қар басып қалу мен көктемгі тасқын қаупі жоғары аймақтар көп. Тіпті, қаланың Жаңасемей ауданының өзінде де рельс бойын су шайып кетуі ықтимал телімдер бар. Бұл аумақ қалалық төтенше жағдайлар басқармасының да қадағалауында тұр. Сонымен қатар, Шөптіқақ, Суықбұлақ, Жаңғызтөбе сынды қар кісі бойынан келетін, жиі бұрқасындататын станцияларда тәуліктік кезекшілік қойылған.

Тасқынға тосқын – бүгіннен

Читайте также

Сейчас читают