Мал иесі шығынды төлейді  

 Шу станциясы тоғыз жолдың торабына орналасқан ірі станцияның бірі. Сондықтан, қозғалыс қауіпсіздігі, мален жанның теміржолға шығып кетуі  сынды мәселелер  шулық теміржолшылар үшін екі есе өзекті.  Жуырда Шу станциясында өткен дөңгелек үстел тақырыбы да қауіпсіздік мәселесіне арналды. Теміржолшылармен қатар, күзет қызметі, көлік прокуратурасы мен желілік ішкі істер бөлімі қызметкерлері қатысқан алқалы жиында  Жамбыл жүк тасымалы бөлімшесі директорының Шу аймағы бойынша орынбасары Серік Каликов 1 ақпан мен 1 наурыз аралығында өтіп жатқан «Еңбек қауіпсіздігі мен денсаулық – әр қызметкердің міндеті» айлығы төңірегінде сөз қозғап, қауіпсіздікті сақтауда атқарылған жұмыстарға тоқталды. Ал Ірілендірілген Шу жол дистанциясының директоры Нұрлан Жаманқұлов есепті мерзімде дистанция қызмет көрсететін аумақта жеті мал басу оқиғасы тіркелгенін айтты. «Жақында ғана темір жолдың бойында локомотив жылқы малын қағып кетті.  Одан келген 2 474 268 теңге шығынды кім төлейді? Әрине, мал иесі. Оның үстіне аз сома емес. Сондықтан біз  мал иесін анықтап, аталған соманы  төлеткізетін болдық. Бұл өзге де шаруаларға сабақ болса екен деген ойымыз бар,» деді Нұрлан Жаманқұлов. Жиында прокуратура қызметкерлері ЖТ Жамбыл жол бөлімшесі қызмет көрсететін аумақтағы күзетілетін өткелдерге бейнебақылаулар орнатып, ұялы телефондағы байланыс желісі  арқылы жұмысты ширату керектігін айтты. Жиынды қорытындылаған Серік Нұрғалиұлы бүгінгі күні аймақта пойыздар қозғалысының жылдамдығын көтеруде қаншама жұмыстар жүргізіліп жатқанын, сондықтан қозғалыс қауіпсіздігіне кедергі келтіретін факторларды жою – баршаға ортақ міндет екенін  тағы да ескертті.

Арсен БАЙЗАҚ, Шу