Құрметтеп шығарып салды

Новости

10.06.2016, 11:11

Ақтөбе жол бөлімшесі аумағындағы Бас пошта экспедициясының ұжымы он төрт жылын жолда хат-хабар тасымалына арнаған пошта экспедиторы Әділ Ізмағамбетовті салтанатты жағдайда құттықтап, сый-сыяпатын табыстап, көп жылғы еңбегінің зейнетін көруге шығарып салды. – Сіз біз үшін жай әріптес болмадыңыз. Осында құбыр жарылса да, жүгірдіңіз, есіктің топсасы шығып қалса да, құрал-сайманыңызды алып, жүгіріп келе қоясыз, осындағы қыздар мен жігіттерге аға бола білдіңіз, – деп жылы лебізін білдірді пошта экспедициясының басшысы Рахметулла Наукенов. Пайғамбар жасына толып отырған пошта қызметкеріне алғыс хаттар табысталып, әріптестері ақ тілектерін жаудырды. Ақтөбе жол бөлімшесі мен кәсіподақ басшылықтарының құттықтау хаттары оқылды. –Мен үшін қызық өмір енді басталғандай. Ойымда жүрген жоспарлар көп. Ғылым саласына қатысты пайымдарым бар. Игіліктің ерте-кеші жоқ демей ме...– дейді зейнеткер ағамыз. Ағамыздың жас шағында әдебиет, өнер саласына да жақын болғанын білдік. Ұзақ сонар жырларды нақышына келтіріп жатқа айтып, талай той-домалақта жас келіндерге беташарын орындаған екен. Тіпті қара домбырасын арқалап, Алтынбек Қоразбаев жетекшілік еткен тараздық өнер ұжымымен де талай өңірді аралапты. –Ақтөбе өңіріне көшіп келіп, жұмысбасты болғаннан бері домбыраны қолға көп алмаппын. Кейде шағын той-томалақтарда әу деп қоямын, – деген кейіпкеріміз пошта экспедициясында еңбек еткен он төрт жылында талай жақсы-жайсаңмен жолдас болғанын мақтанышпен айтады. – Жұмысымды алғаш келген күннен ұнаттым. Жалақысының аздығына қарамадым. Айына төрт мәрте жолға шығатынбыз. Біздің жұмысымыздың да өзіндік жауапкершілігі бар. Маңызды құжаттарды, хат-хабарды уақытылы жеткізу керек. Жұмысыңды абыроймен орындағанға не жетсін?!

Құрметтеп шығарып салды

Читайте также

Газета «Қазақстан теміржолшысы», №56 от 05 июля 2024 года