Қозғалыс жиілігі артқан

Новости

28.07.2017, 10:41

2 мин чтения

Қандыағаш станциясы тоғыз жолдың торабы саналғандықтан, бұрын да қозғалыстан кенде емес еді. Бүгінде қозғалыс тіпті жиілеп, арылы-берілі ағылған әсіресе жолаушы пойыздары көбейген. -Жоспарды орындадық. Көрсеткіштер алдыңғы жылдармен салыстырғанда жақсарып келеді. Қазірдің өзінде барлық параметр бойынша жағдай әлдеқайда жақсы. Оның үстіне, осы жылы жолаушылар пойыздары саны артты. Соған орай жұмыс көлемі де бұрынғыдан көбейген, - дейді Қандыағаш станциясының басшысы Нұрибай Сәрсенов. Станция басшысының айтуынша, мекеме сұрыптау станциясымен, вагон және локомотив шаруашылықтарымен қойын-қолтық жұмыс істейді. Станция арқылы EXPO-2017» көрмесіне орай үш жұп, яғни алты жолаушылар пойызы өтіп жатыр екен. Қыркүйек айының алғашқы онкүндігіне дейін қатынайтын жолаушы құрамдары арқылы Қандыағаш арқылы аталмыш көрмеге лек-легімен кетіп жатқан жолаушы да көп көрінеді. Орал, Атырау, Маңғыстаудан шыққан пойыздар Астананың жаңа «Нұрлы жол» вокзалына барады. Нұрибай Сәрсеновтың айтуынша, жолаушылар пойыздарымен қатар жүк пойыздары да артқан. Мәселен, жол құрылысы жұмыстары көлемінің артуына байланысты Ақтөбе облысының Мұғалжар, Шалқар аудандарынан қиыршық тас тасымалданып жатыр. -Күніне 30-40 вагон қиыршық тас Байғанин ауданы Қарауылкелді станциясына жіберіледі. 40-50 вагон Мақат станциясына жөнелтіледі. Облыс аумағында автомобиль жолдары салынып, қиыршық тас тасымалдануда. Сәйкесінше, жүк тасымалы көлемі де артты. Қандыағаштан күніне 10 вагон силикат жөнелтіледі. Сырттан әктас келеді. Жеке адамдар Маңғыстаудан қиыршық тасты да теміржол арқылы тасымалдайды. «Вернал Ойл» компаниясы да ай сайын 15-20 вагон мұнай композиттерін тиейді. Мұғалжар мен Бершүгір станцияларынан жөнелтілген вагондар Қандыағаш станциясының басында сұрыпталады, - дейді Нұрибай Сәрсен. Бүгінде теміржолшылар алдында отандық вагон паркін пайдалану мәселесі өзекті. Өзге елдердің вагондарын пайдалану үлесі әлі де болса көбірек. Сондықтан, қазақстандық вагондар үлесін 60 пайыздан шамамен 80 пайызға арттыру көзделуде. Айта кетейік, бүгінде Қандыағаш станциясында 265 адам еңбек етеді. Шалқар-Тассай теміржол тармағынан үш маман осында қызмет ауыстырыпты. Бүгінде олар айлық сынақтан өтіп жатыр екен. -Бүгінде станция жұмысы толық автоматтандырылып келеді. Сигналистер орталықтандырылған жүйемен жұмыс істейді. Станция жұмысы бір сәтке де тоқтамайды, - дейді мекеме басшысы.

Қозғалыс жиілігі артқан

Читайте также

Сейчас читают