ЭКСПО қонағы – балалар

Новости

08.08.2017, 10:16

Күллі әлем көз тіккен көрмені көріп, тамашалауға асыққан адамдардың аяғы әлі басылған жоқ. Солардың қатарында жазғы демалыстарын тиімді пайдаланған жас жеткіншектердің де қатары мол. Өткен аптада теміржолшылардың балалары да елорда қонағы болды. Бүгінде «ҚТЖ»ҰК»АҚ мен «Самұрық-Қазына» АҚ -ның «Туған елге саяхат» атты жобасы аясында экскурсиялық тур өтіп жатыр. Бұл бірегей жобаға теміржолшылардың 150 баласы мен шығарма жазу байқауынан үздік шыққан 50 жас жеткіншек қатысуда. 10 күнге созылған турда бұл жасөспірімдер 2 тамыз бен 12 тамыз аралығында Қазақстанның 4 қаласын аралауы жоспарланған. Бұл турды олар Астанадан бастады. – Бұл жобаның мақсаты – балалардың патриоттық сезімін ояту. Еліміздің түкпір-түкпірінен жиналған жасөспірімдер осындай жобалар арқылы туған елге саяхаттап, елдің көрікті жерлерімен танысып, көкжиектерін кеңітпек. Оған қоса, өздеріне көптеген достар таппақ. Турды біз бас қаладан бастаған себебіміз, Астанада әлем көз тіккен ЭКСПО көрмесі өтіп жатыр. Мұнда ҚТЖ-ның да павильоны бар. Біз балаларды осы көрмеге арнайы әкеліп, таныстырып жатырмыз,-деп мәлімет берді лагерь тәрбиешісі Самал Әбілбек. Жан-жақтан жиналған жасөспірімдер Ұлттық компания павильонын тегіс аралады. Мұнда олар «Жаңа Жібек жолы» орталық интерактивті үстелін қызықтап қарады. Сондай-ақ «Теміржол машина жасау ісі», «Логистикалық инфрақұрылым: қазақстандық көліктің Батыс және Шығыс қақпасы», « Астана халықаралық әуежайы мен «Нұрлы жол» жаңа темір жол вокзалы» «GE виртуальды шынайылық жүйесі», «Темір жол көлігінің энергия үнемдеудегі үлесі» экспозицияларын тамашалады. Көрмені аралау барысында жас жеткіншектер өздерін қызықтырған сан сұраққа жауап алып, теміржолшылардың костюмін киіп естелікке суретке түсті. – Мен Семей қаласынан келдім. Әкем-теміржолшы. Астананы аралап, ЭКСПО көрмесін көріп қуанып жүрмін. Көптеген достар таптым. Көңіл-күйім керемет! Бізге осындай жақсы дүниелерді көрсетіп жатқан ұйымдастырушыларға рахмет айтамын, -деп ой бөлісті Ердос Еркежанұлы Күнұзаққа көрмені тамашалаған жастар кешкісін би алаңында бас қосты. ҚТЖ-ның оқу орталығында флешмоб билеген жас патриоттар кеш соңында арман-тілектерін айтып, көкке шар ұшырды. Еліміздің бас қаласынан бастау алған «Туған елге саяхат» жобасы Қазақстанның Ақтау, Түркістан, Алматы сынды қалаларында жалғасын таппақ.

ЭКСПО қонағы – балалар

Читайте также