Күзет қырағылығымен құнды

Новости

22.07.2016, 18:19

«Әскерилендірілген темір жол күзеті» АҚ Алматы филиалы – Жамбыл атқыштар командасының қырағы жігіттері Түлкібас, Мойынты, Отар аралығындағы жүктердің қауіпсіздігі мен сақталуына жауап береді. Бір ғана Жамбыл өңірінде бес атқыштар командасы бар. Жыл басында Магистральдық желі бөлімшесі және қозғалыс бойынша келісімшартқа отырған мекеменің қызметкерлері өздеріне жүктелген міндеттердің үдесінен шығуда. – Біздің жігіттер темір жол мекемелерін күзетеді. Олардың қатарында әкімшілік ғимараттар мен стратегиялық нысандар бар. Көпірлер, өткелдер бар. Сондай-ақ жүк пойыздарын ілеспе күзету бар. Одан өзге станция парктерінің күзеті де біздің мойнымызда. Жұмыс барысында Жамбыл жол бөлімшесімен, Магистральдық желі бөлімшесімен, көлік прокуратурасы және желілік ішкі істер қызметкерлерімен тығыз жұмыс жасап келеміз. Тасымалданған жүктің сақталуын қадағалауда темір жолдың тиісті мекемелерімен бірлесе жұмыс жүргізіп отырмыз. Жалпы, жаз айларында жол бойында ұрлақ-қарлық дерегі жиілейді. Сондықтан бұл маусымда күзетті күшейтеміз. Ағымдағы жылдың өзінде біздің жігіттердің көмегімен 20 ұрлық тіркелді. Өткен жылы бұл көрсеткіш 35 болған еді. Бұл ұрлық жасағандардың теміржолшыларға еш қатысы жоқ, бөтен адамдар. Сондай-ақ қоғамдық орындарда бұзықтық жасаған 163 азамат әкімшілік жауапкершілікке тартылды , – дейді «Әскерилендірілген темір жол күзеті» АҚ Алматы филиалы бастығының орынбасары, Жамбыл атқыштар командасының басшысы Рахметжан Жанабаев. Өңірдегі Жамбыл, Шу, Луговой, Сары-Шаған, Жаңатас, Қаратау сынды станциялардың басындағы атқыштар командасының жігіттері де қырағы қызметтерімен көңілден шығуда екен. Жігіттер төрт ауысымда жұмыс жасайды. Жұмыс орындары жасақталған, мұздатқыш, қысқатолқынды пеш, т.б. қажеттіліктің бәрі бар. Арнайы киімдермен жабдықтауда да ешқандай олқылық жоқ. Қызметте жүрген жігіттердің орта жасы – 35-40 жасты құрайды екен. Бүгінде темір жол мекемелерінде терроризм мен экстремизмнің алдын алуда көптеген шаралар қолға алынып отыр. Оның қатарында әскерилендірілген темір жол күзетінің сарбаздары да дайындықтан өтуде. Ағымдағы жылдың өзінде ҰҚК-мен жоспарлы жеті оқу-жаттығу шаралары ұйымдастырылыпты. Күзет жігіттері толықтай рация құрылғыларымен қамтамасыз етілген. Және әр күзетші де қызметтік ұялы телефонмен қамтамасыз етілген. Кезекшілікке шыққанда сарбаздар осы телефондарды өздерімен алып жүреді екен. Оқыс оқиға орын алғандай болса байланысқы шығуға өте тиімді дейді мамандар. Біз барғанда станция паркінде Жамбыл атқыштар командасы басшысының жүк тасымалы бойынша орынбасары Азамат Сәрсенбаев пен нысандар бойынша орынбасары Ғалымжан Аязбаев күзетшілерге Мәжит Оразалиев пен Мұрат Мақсұтовқа қауіпсіздік жөнінде нұсқаулық өткізіп жатыр екен. Себебі, әр күзетші нұсқаулықтан өткеннен кейін ғана міндетіне кіріседі екен.

Күзет қырағылығымен құнды

Читайте также

Газета Қазақстан теміржолшысы, №108 от 26 декабря 2025 года