Өткелден өткен де бар, өтпеген де...

Новости

23.02.2018, 12:22

Бейнебақылау орнатудың шығынын айыппұлдан өндіре алады деген еді осы сала маманы. Адамдар тек пойыз жолды кесіп өтуден емес, өтпелерде автокөлікпен пойызға өздері келіп соқтығысып ажал құшқан немесе мүгедек атанған оқиғалар сәт сайын қайталануда. Пойыздың алдын кескен жүргізуші ғана кінәлі емес, заманға сай өтпені жабдықтамаған теміржолмен қатар қала, аудан басшылары да қауіпсіздікке немқұрайлы қарауда. Қарапайым теміржолшының міндеті – қауіп-қатер жайлы айтып түсіндіріп, сақтандыру. Ал халықтың бір аты – тобыр. Естісі мен есері қатар жүретіндіктен, бірі ережені сақтаса, екіншісі сақтамайды. Жыл басталмай жатып Семей, Павлодар сынды аймақтарда өтпедегі апаттың салдарынан екі адам қайтыс болды. 7 қаңтарда Ақсу – Құркөл аралығындағы күзетілетін өтпеде автокөлікпен жүк көлігі соқтығысқан. 29 қаңтарда Семей жол бөлімшесіндегі бір күзетпелі өтпеде жүк көлігімен маневр локомотиві соғысып, салдарынан пойыз құрастырушы қайтыс болған. Ал 14 ақпанда Павлодар жол бөлімшесінде күзетпесіз өтпеде жүк пойызымен жеңіл автокөлік соқтығысып, автокөлік жолаушысы оқиға орнында қаза тапқан. Айналдырған екі айға жетпейтін уақытқа аз емес... Тағы да осындай қанды оқиғаның қайталанбауы үшін алынған шаралар қатарында ұлттық компания бойынша «Абайлаңыз, өтпе!» айлығы жүріп жатыр. Шымкентте ақпанның 15-інде басталған айлық шеңберінде Шымкент жол дистанциясының жетекші инженері Ақтолқын Жоланова өтпеде жүргізушілерге қауіптің алдын алуды ескерту үшін қалалық МАИ қызметкерлеріне ерте шығады. Әйтпесе сөзіңді тыңдау былай тұрсын, «не айтып тұрсың?» дегендей кекесінмен мазақ етіп кететіндер көп екен. Дистанция аумағындағы 7 күзетілетін, 11 күзетпесіз өтпе бар. Жетекші инженері осы жеті нысанға айлық ішінде жеті рет барып, жеті рейд ұйымдастырған. Өтпеден өтудің ережесі жазылған парақшалар әрі-бері өткен көлік жүргізушілеріне таратылып, ал күзетілмейтін өтпелердегі ескірген қауіпсіздік белгілерін жаңарту қолға алыныпты. Қалаға іргелес жатқан Сайрам ауданымен екі ортадағы көлік нөпірінде есеп жоқ. Жол ережесін бұзу оқиғасы Сайрамға баратын Қызылсай – Шымкент телімінің 3301-шақырымындағы өтпеде жиі орын алады. Бұл аумақтан тәулігіне шамамен 3500 көлік өтеді. Ал қаланың «Азат» мөлтек ауданынан қатынайтын жеңіл және қоғамдық көліктер он мыңнан асып кетеді. Өткен жылы Шымкент өңірінде жекеменшік темір жол тарапындағы өтпеде жүк көлігі пойыздың алдынан шығып апатқа ұшырап еді. Одан кейін Ленгер бағытындағы күзетпесіз өтпеде ережеге бағынбаған жүргізуші локомотивпен соғысты. Жүргізуші ауруханаға түсіп, көлігі жарамсыз болған. Әрине, өтпелерде сақтандыру шаралары айлық кезінде де, айлықтан тыс та ұдайы жүргізіліп келеді. Ал күнделікті кезекшілікте тұратын өтпе кезекшісі тәулігіне 12 мыңнан асатын көліктің қайсыбірін қадағалап үлгерсін. Кейде жартылай ашық шлагбаумнан көз ілеспес жылдамдықпен өте шығатын көліктің нөмірін шырамытқан күйі қалады. Бүгінде Ресей темір жолдарында енгізілген талай жаңа технологиялар Қазақстанда да сынақтан өтіп, қолданысқа енгізіліп жүр ғой. Өтпеге келгенде де олардың тәжірибесі қолдануға сұранып тұр деседі. Яғни, пойыз келе жатқанда жер астынан екі-үш қарыс темір көтеріле қалады да көлік түгілі жай адамның өзі өте алмайтын кедергі пайда болады. Екінші жолы – бейнебақылау қою. Бұлтармас айғақты көріп, айыппұл төлегендер екінші рет сақтыққа көшетіні белгілі. Әйтпесе қауіпсіздікті құр сөзбен қамтамасыз ету бекершілік дейді мамандар.

Өткелден өткен де бар, өтпеген де...

Читайте также

Газета Қазақстан теміржолшысы, №49 от 26 июня 2026 года