Жылу қазандықтары бабында

Новости

23.02.2018, 12:43

Қыстың көзі қырауда отырған орныңның құстың ұясындай жып-жылы болғанына не жетсін. Аймақтағы теміржол саласы мекемелері мен нысандарды ауыз сумен және қыста жылумен қамтамасыз ететін «Теміржолсу-Қызылорда» ЖШС меншігіндегі 8 жылу қазандығы бүгінде өз тұтынушыларын үздіксіз жылу энергиясымен қамтамасыз етуде. Төретам, Жосалы, Жалағаш, Тереңөзек, Белкөл, Шиелі және Жаңақорған станцияларында орналасқан жылу қазандықтарының жұмысына тұтынушылар тарапынан арыз-шағым болмаған. – Қаңтар айындағы еліміздің бірқатар облыстарында және біршама уақыт өз облысымызда да сыртқы ауа температурасының күрт төмендеуіне байланысты жылу қазандықтарындағы жұмыс тәртібі күшейтілген режимде жұмыс жасап, соған орай кезекшілік пен бақылау күшейтілді. Жылу жүйелері техталапқа лайықты деңгейде қымталып, күтімге алынды. Жылу ошақтары пайдаланылатын негізгі шикізат түрі – қажетті көмірмен жылыту маусымының соңына дейін жететіндей қормен қамтамасыз етілген. Сондықтан жылу мәселесінде алаңдауға еш негіз жоқ, – дейді мекеменің техникалық бөлім инженері Мақсат Мұхтарұлы Байхонов жылу қазандықтарының жұмысы жайлы. Мекеме тарататын жылуды пайдаланушылар – темір жол кәсіпорындары мен жергілікті тұрғындар. Жалпы жылу жүйесінің ұзындығы 1,35 км шамасында. Қазандықтан сағатына 0,363 Гкал көлемінде шығатын орташа жылу қуаттылығы жылу желілерінің тиісті дәрежеде күтімге алынуына байланысты тұтынушыға жылу қазандығынан шығатын бастапқы мөлшерден ауытқымай жеткізіледі екен. Қысқы маусымға осылай, тиісті дәрежеде қамданыс жасаған жылу беруші серіктестік ұжымы «қыстың бір күні қалса, қорық» деген қағиданы ұстанып сәуірге дейін жылу беруін тоқтатпақ емес.

Жылу қазандықтары бабында

Читайте также

Газета Қазақстан теміржолшысы, №32-33 от 28 апреля 2026 года