Жүргізуші, саған айтам...

Новости

30.03.2018, 17:53

2 мин чтения

Темір жол өткелі – бұл теміржол мен автокөлік жолдарының тоғысқан жері болғандықтан жолдың қауіпсіздік ережелерін қатаң сақтауға көңіл бөлетін аса қауіпті де қиын бөлігі. Статистикалық мәліметтерге сүйенсек, жол-көлік оқиғаларының көп бөлігі өткелде болады екен. Сол үшін автокөлік жүргізушілерінің жол жүрудегі қарапайым талаптарды сақтауын тағы да ескертіп, арты аса ауыр зардаптарға соғатын оқиғалар мен заң бұзушылықтардың алдын алу, болдырмау мақсатында Маңғыстау жол дистанциясында 15 ақпаннан 15 наурызға дейін «Абайла! Темір жол өткелі» атты айлық жарияланған болатын. Айлық аясында Өзен, Шетпе станцияларындағы өткелдерде қоғамдық тәртіп сақшыларымен бірге Маңғыстау жол дистанциясының қызметкерлері "темір тұлпар" тізгіндеушілерді біртіндеп тоқтатып, өткелден өту ережесін түсіндіріп, «асығыстық – шайтанның ісі» болатынын талай мысалдармен жеткізуге тырысты. Ескертпе кітапшалары таратылды. – Жол қауіпсіздігі ережесінің 15.2 тармағында теміржол өткеліне жақындағанда жүргізуші орналасқан жол белгілеріне, бағдаршамға, шлагбаумның күйіне және теміржол өткел кезекшісінің берген нұсқаулығына мән беріп, пойыздың жақын маңда жоқтығын қарап өту қажеттігі тайға таңба басқандай анық жазылған. Автокөлік жүргізушілерін, сонымен қатар теміржол өткелінінде жол қауіпсіздігі ережесін өрескел бұзғандарға салынатын айыппұл мөлшерімен таныстырдық. Атап айтсақ, теміржол өткелін жабық шлагбаумда немесе жабылып жатқан шлагбаумда, бағдаршамның немесе өткел кезекшісінің тыйым салған белгісінде өту, сондай-ақ теміржолға зақым келсе, 2-ден бастап 30 айлық есептік көрсеткіш мөлшеріне дейін айыппұл төлеуге тура келетінін еске салдық. Жол-көлік апатының тек материалдық шығынмен шектелмейтінін, ең бірінші кезекте жолға шыққан әрбір адам оны үйінде ет жақындары, бауыр, бала-шағасы күтіп отырғанын бір сәт те естен шығармауы керектігін тек жүргізушілер емес, жалпы жұрт жадында ұстауы қажеттігін жеткізуге тырыстық. Қысқасы, «жүргізуші, саған айтам, жалпы жұрт, сен де тыңда» болды мақсатымыз, – дейді Маңғыстау жол дистанциясы жетекші жол инженері Ерлан Аманжолов.

Жүргізуші, саған айтам...

Читайте также

Сейчас читают