Көктемгі байқау қыр астында

Новости

03.04.2018, 13:54

Луговой – аймақтағы ірі түйіспелі станция. Жер қарайып, күн жылынғалы бері станциялықтар алдағы көктемгі комиссиялық байқауға қызу дайындықты бастап та кеткен. Қыс айларында жиналған станция маңындағы күл-қоқыстар шығарылып, көктемгі сенбіліктер ұйымдастырылуда. Шекаралық станцияда пойыздарды өткізу жұмысы кестеге сай, қалыпты. Тәулігіне мұнда алты пойыз жасақталып, өткізіледі. Егерде жолаушылар пойызын қосар болсақ, онда жеті-сегіз пойызға дейін өтеді. Бүгінгі күні станцияда 92 адам еңбек етеді. – Станцияда негізінен көрші жатқан Қырғыз еліне пойыздар өтеді. Бүгінгі күні көршілермен ешқандай мәселе жоқ. Түсіністікпен жұмыс атқарудамыз. Тәулігіне көрші мемлекетке алты пойыз кірсе, олардан да сондай көлемде пойыз шығады. Сондай-ақ Қырғыз елінен аптасына келіп-кететін төрт жолаушылар пойызы бар. Әсіресе, жыл соңында жүк көлемі артқан сәтте мұнда жұмыс қызады. Пойыздар қозғалысы қауіпсіздігін қамтамасыз ету мен еңбекті қорғауда да нақты шаралар қолға алынған, – деп ақпарат берген Луговой станциясының бастығы Тимур Кусановтың мәліметінше, мал мен жанның теміржол бойына шығып кетіп, қозғалысқа нұқсан келтіруі мұнда да басты «бас ауру» екен. Халықты сақтандыру, ескерту жасау бойынша жергілікті әкімдікпен, желілік ішкі істер басқармасымен бірге теміржолшылар ұдайы жұмыс жүргізіп келеді екен. Ай сайын станцияда бір рет тиісті құрылымдар бас қосып, проблемалы тұстар сөз болып, нәтиже талқыланады, шаралар алынады екен. – Қазіргі күні біздің тарапымыздан теміржолдың бойын қоршау шараларын жүргізу бойынша жауапты мекемелерге хат жазылып, сұраныс та жасалып отыр. Станция үлкен. Сондықтан, қауіпсіздік шараларын жоғары деңгейде жүргізуде барлық мүмкіндігімізді пайдаланып отырсақ та, үлкен күш керек. Дегенмен, биылдыққа келеңсіз оқиға орын алған жоқ, станцияда орналасқан өзге де теміржол мекемелерімен тығыз жұмыс жүргізудің арқасында қауіпсіздікті толық қамтамасыз етіп отырмыз, – дейді станция бастығы.

Көктемгі байқау қыр астында

Читайте также