Көпір күзде беріледі
Шымкент қаласының шеткі шағын аудандары мен Төле би ауданына баратын Қапал батыр көшесінде темір жол үстінен өтетін көпір құрылысы жүріп жатыр.
Құрылысы басталғанына ек іжыл болған жоба бұйыртса биыл қазан айында пайдалануға берілмек. Темір жол мен автожолдың қиылысқан тұсындағы жол өткелінде негізгі жұмыстар сексен пайызға аяқталған. Қазір өткелдің екі жағынан жаяу жүргіншілерге арналған жолаяқтың іргетасы салынуда. Сосын жол шетіне темір қоршаулар орналастырылмақ. Соңында үстіңгі асфальт қабаты төселеді. Бұйыртса, екі айдан соң халық қиналмай, көпір арқылы жүретін болады. Өткелден бірнеше көлік емін-еркін сиятын болмақ.
– Мердігер компания темір жол үстіндегі бөлігіне жұмыс жүргізетін кезде, уақытын жазып алдын ала телеграмма жібереді. Біз сол күндерге туралап, екі жылдан бері апасына екі-үш рет бірде алты, бірде он екі сағатқа толаскез алып береміз. Оның пойыздар қозғалысына еш кедергісі болған жоқ, – дейді Шымкент жол дистанцияның бас инженері Нұралхан Мұсаев.
Қазір жұмысты екі автокран, бір экскаватор, автогрейдер сынды отыз техника мен елу жұмысшы еңсеруде.
– Теміржолшыларға үлкен рахмет! Уақытылы толаскез беруінің арқасында жұмысты бірлесіп аяқтап қалдық. Алпыс жылдан бері тұтас қайта жаңарған көпірдің ендігі қолданысы елу жылға жетуі мүмкін, – бас мердігер «Береке» компанияның бас инженері Тәңірберген Сүлейменов.
Дирара Балқыбекова, Шымкент