Тау бөктеріндегі бекет

Көктерек – табиғаты көркем  таулы өңірде орналасқан төртінші класты станция.  Шымкент іргесіндегі Түлкібастан кейін осы Көктерек станциясы, әрі қарай Меңлібай, Састөбе, Ынтымақ бекеттері, барлығы дерлік таудан шығатын қиыршық тас пен әктас жөнелтеді. Таудың бауырындағы аядай ғана Көктерек бекетінің бір өзі Қырғыз еліне ай сайын 40 вагон қиыршық тас жібереді. Бұл жердегі таудың тасы цементке емес, кәдімгі тұтынатын қант қоспасын кристалдандыру үшін керек. Қанттың өзі қоймалжың  болғандықтан, әк тасты күйдіріп, соның буымен қантты қатыратын көрінеді. Бұрын Жамбыл облысындағы Меркедегі қант шығаратын зауытқа да ай сайын 20 вагон жүк тиелетін. Қазір зауыт жұмысы тоқтағалы тек қырғыздарға жөнелтілуде. Көктеректе станция бастығы Қуаныш Оралұлының басшылығымен үш станция кезекшісі, бір тауар кассирі барлық жұмысқа жауапты. Жолшылар мен байланысшылар, электрмен жабдықтаушылар барлығы соңғы үлгіде салынған жақсы ғимаратта қатар отырып жұмыс істейді. Жоғарыда айтқанымыздай, мұндағы теміржол таудың етегін ала орналасқан. Ауыл болса еңісте. Сондықтан, ілуде бір жоғалған малын іздеп жүрген немесе төрт-түлік жайып жүрген тұрғындар болмаса, ауылдағы 200-ден аса түтін иелеріне теміржолдан келер қауіп жоқ. Көктерек бекеті орналасқан ауыл – алаштың арда азаматы, Түрксіб  теміржолын салуға зор еңбегі сіңген мемлекет қайреткері Тұрар Рысқұловтың туған жері. Бұрынғы Ждановтан қазір Рысқұл ауылы болып өзгерген. Үш станция кезекшісі осы ауылда тұрады, қалғандары аудан орталығынан, көрші елді мекендерден жеке көлігімен қатынайды екен. Аптаның бес күнінде станция кезекшісі өз міндетін атқарып отырады. Ал жүк азайған сенбі-жексенбіде табло орталықтандырылған диспетчерлік жүйемен басқарылады. Қыста қар қалың түсетіндіктен, бұл өңірде жолшылар үшін жұмыс жеткілікті. Жақында Түлкібас – Көктерек, Көктерек – Меңлібай аралығындағы бірінші жолға күрделі жөндеу жүргізіліп, жол табаны сауықтырылған. Тағы бір жақсысы, теміржол жиегіне мал жайыла алмайды. Төменде мал айдайтын көпір бар. Төрт-түлік ертелі-кеш өріске сол көпір арқылы келіп кететіндіктен, теміржолға малдан да қауіп жоқ. Бірақ, теміржолшылар халыққа теміржол бойы қашанда қауіпті екенін ұдайы ескертіп тұрады.   Динар МЕЙІРМАН, Көктерек Суретті түсірген автор