Су сапасына сын жоқ
Еліміздің батыс және оңтүстік облыстары арасын жалғайтын жолаушылар пойызының дені Шалқар станциясына аялдайды. Сәйкесінше, жолаушыларға қажетті ауыз су да вагондарға осы станцияда құйылады. «Вагонсервис» АҚ Жолаушылар вагондарын жөндеу жөніндегі Батыс филиалы Шалқар сумен жабдықтау телімінің шебері Айболат Дәуітовтің айтуынша, биыл диаметрі 30 миллиметр болатын 200 метр құбыр сатып алынған. – Станция арқылы тақ күндері 6-7 пойыз өтеді, жұп күндері 5 пойызға дейін тоқтайды. Аялдау уақыты орташа алғанда 15-20 минутқа созылады. Негізінен «Ұлы борсық» ЖШС ауыз суын пайдаланамыз, су сапасы жөнінде осы кезге дейін шағым болып көрген емес, керісінше біздің суды мақтайды, – дейді Айболат Дәуітов. Телім шеберінің есебінше, бір вагонға шамамен 1 текше метр су кетеді. Ал бір жолаушылар пойызының құрамында 20 вагон деп есептегенде 20 текше метр су айдалады. – Шалқар сумен жабдықтау телімінде бүгінде барлығы 28 адам қызмет етеді. Жалпы, перронға 22 вагонға дейін сыяды. Барлығы 20 құдық бар, – дейді телім өкілі. Айтса айтқандай, Шалқар суының сапасына сын жоқ. Кезінде «Шалқар суы» деген брендпен құйылатын минералды судың дәмін көпшілік ұмыта қоймаған шығар. Сондықтан жолаушылар ғана емес, жақын маңдағы тұрғындар да Шалқар станциясында вагондарға құйылатын суды тұтынуға тырысады екен.
Асқар Ақтілеу, Ақтөбе