Қатал маусымға тастүйін дайын

Новости

04.10.2016, 18:00

Маңғыстау жүк тасымалы бөлімшесіне қарасты станциялар мен шағын бекеттердегі темір жол саласындағы мекемелерді, сол елді мекендердегі халықты сапалы ауыз сумен үздіксіз қамтамасыз ету, кәріз жүйелерінің қалыпты жұмысын үйлестіру, жылу беру тағысын тағы шаруалар «Теміржолсу-Маңғыстау» ЖШС-нің қызметі. Біз бүгін аталған мекеменің директоры Орын Оразғалиевті әңгімеге тартып, таза ауыз су және кәріз су нысандарының қысқы науқанға дайындығы, атқарылған жұмыстары туралы білдік. –Бүгінде біз «ҚазТрансОйл» АҚ, «Маңғыстаужылу» және «Өзенинвест» МКК сияқты ірі кәсіпорындарға су жеткізіп беріп отырмыз. Су әлеуметтік тауар. Сондықтан табысынан шығыны көптеу. Сол себепті ірі кәсіпорындарға қызмет көрсету арқылы шыққан шығын орнын жабуға тырысамыз. Жалпы, біздің мекемеге қарасты сумен жабдықтау нысандарының су беру жылдық қуаттылығы 371,38 мың текше метр. Ауыз сумен қамтамасыз етілетін 6981 тұтынушының ішінде, 25% – жеке тұлғалар, 19,5 – заңды тұлғалар, 38,2% –темір жол мекемелері, 5%– бюджеттік мекемелер, 12,3% тұтынушылардың басқа топтары. Ал жылумен Маңғыстау станциясындағы 12 мекемені жабдықтап отырмыз. Оның екеуі бюджеттік, біреуі сыртқы, қалғандары темір жол мекемелері. Бейнеу станциясы бойынша жеті темір жол мекемесіне жылу беріп отырмыз, – дейді Орын Рауұлы. Оның айтуынша, ауыз су және лас су айдау жүйесінің ғимараттары 1965-1966 жылдары салынған. Десе де, әлі жұмыс істеп тұр. Барлық талаптарға сай жабдықталып, толықтай жөндеуден өткен мекемеде 231 қызметкер өз міндеттерін қалтқысыз орындауда. «Теміржолсу-Маңғыстау» ЖШС-нің Опорный станциясынан Маңғышлаққа, Бейнеу – Тассай, Бейнеу – Оазис және Өзен – Болашаққа дейінгі қызмет көрсету телімінің ұзындығы – 1356 шақырымды құрайды екен. «Осы аралықтағы 7 станцияны орталықтандырылған су құбырлары арқылы ауыз сумен қамтамасыз етіп, кәріз суларын қабылдаймыз, ал 30 бекетке ауыз суды цистерналармен тасымалдаймыз. Біздің мекеме қарамағына 2014 жылдың қазан айынан бастап «Теміржолжылу-Атырау» ЖШС-нен Бейнеу және Маңғышлақ станцияларындағы жылу тарату қазандықтары берілді. Бүгінде серіктестік меншігінде 42,25 шақырым ауыз су құбыры, 27,12 шақырым кәріз су және 9,32 шақырым жылу тарату құбыры, 3 жер асты су ұңғымасы, 6 су айдау және 8 кәріз су айдау станциясы, сондай-ақ, 7 дана жоғары қысымды су мұнарасы мен 2 жылу беру нысаны бар», – дейді мекеме басшысы. ─ «ҚТЖ» ҰК» АҚ-ның «Мөлдір бұлақ» бағдарламасы шеңберінде қандай шаруалар тындырылды? ─ Бұл халықтың әл-ауқатын арттырып, денсаулығын түзетуге негізделген тамаша бір бағдарлама болды. Қалай дейсіз ғой?! Су – тіршілік нәрі және таза ауыз су денсаулық кепілі. Сонымен, темір жол торабындағы нысандарды ауыз сумен жабдықтау және кәріз суларды қабылдау жүйелерін жаңарту, қайта құрылымдау және санитарлық талаптарға сай қылуға негізделген «Мөлдір бұлақ» бағдарламасы аясында 2012-2014 жылдары «Теміржолсу-Маңғыстау» ЖШС-не барлығы 344 788, 78 мың теңге бөлініп, толығымен игерілді. Бұл қаржыға, 14,72 шақырымдық ауыз су құбыры, 6,3 шақырымдық кәріз су құбыры жаңа талапқа сай полиэтилендік құбырларға ауыстырылса, 4 дана су мұнарасы, 5 дана кәріз су айдау нысаны, 1 дана су шығару ұңғымасы, 2 дана кәріз су тазарту қондырғылары, 2 дана өндірістік және әкімшілік ғимараттар толық күрделі жөндеуден өтіп, жаңартылды. Ал Опорный, Бейнеу, Сайөтес, Шетпе станцияларына ауыз суды бактериядан тазартатын залалдандырғыш қондырғылар және Қаркөл, Үстірт станцияларына ауыз суды кешендік тазарту қондырғылары орнатылды. Сонымен қатар, осы бағдарлама негізінде «Оазис», «Р» бекеттерімен бірге 7-11-12-13-14-15-16 шағын бекеттердегі ауыз су мәселесін шешу мақсатында жаңадан су құю құдықтары салынып, пайдалануға берілді. –Алдағы қыс маусымына дайындық қалай? –Алдағы 2016-2017 жылдардың қыс маусымына шаруашылықты дайындау бағытында биыл біз біраз шаруаның басын қайырдық. Мысалы, мекемеміздің өз қаражаты есебінен 42 086 660 теңге бөлініп, Опорный және Шетпе станцияларындағы кәріз су айдау стансасына, Сайөтес станциясындағы су айдау станциясының санитарлық қорғау аймағына, Үстірттегі ауыз су құбырына күрделі жөндеу жұмыстары жүргізілді. Сонымен қатар Шетпеде су айдау станциясының ғимаратына күрделі жөндеу жүргізіліп жатса, 8261,56 мың теңгеге серіктестікке керекті негізгі мүліктер, сораптар, су өлшегіш құралдар, автокөлік және орташа газ қысымын төменгі газ қысымына ауыстыру қондырғысы сатып алынды. Ал, су және жылу тарату тарифтерін бекіту жоспары бойынша, 8607,03 мың теңгеге Маңғышлақ және Бейнеу станцияларындағы жылу қазандығы орналасқан ғимаратқа, 3066,32 мың теңгеге Шетпе станциясындағы №9 су шығару ұңғымасына күрделі жөндеу жұмыстары жүргізілуде. Сондай-ақ, Маңғышлақ станциясы бойынша биылғы жылы газ таратқыш қондырғы, газ өлшегіш құралы, жаңадан 25 дана ысырма мен ветильдер алынып, 52 метр жер асты жылу трассасы ауыстырылды. Қазандықтар мен жылу трассаларына 5 кг қысыммен толықтай сынау жұмыстары жасалынды, қазандықтар жылыту науқанына тастүйін дайын тұр. Бейнеу станциясында 7 тұтынушы темір жол мекемесі бар дедік қой. Мұнда да газ өлшегіш құралы, 18 дана ысырма толығымен жаңартылды. 280 метр жер асты трассаларына 4 кг қысыммен сынау жұмыстары жүргізіліп, қазандықтардың қатал маусымға дайындығы тексерілді. Өзен, Болашақтағы жылу қазандықтары да назардан тыс қалмай, жылу жүйелеріне 4 кг қысыммен сынау жұмыстары жасалынды. Мұның сыртында, жылу қазандықтарының маномертлері мен термометрлері толықтай тексерілді, – деп ЖШС басшысы Орын Оразғалиев қысқа дайындық жұмыстарынан толық хабардар етті.

Қатал маусымға тастүйін дайын

Читайте также