Тағы да тәртіп мәселесін көтерді

Шымкент вокзалында  «Темір жол – темірдей тәртіп» акциясын өткізген  Шымкент станциясындағы Ішкі істер желілік басқармасының өкілдері тағы да тәртіп мәселесін сөз етті. Тәртіп сақшылары алдымен перронда сапарға шыққалы тұрған жолаушылардың жанына келіп, жылжымалы құрамның қасында сақ жүруге, қол сөмкелеріне мұқият болуға шақырды. Сонымен қатар, қоғамдық орында тек көрсетілген жерде ғана темекі шегуге, керексіз затты тастап ластамауды ескертіп, тәртіп бұзған жағдайда шара қолданылатынын түсіндіре келе, қауіпсіздік ережесі жазылған 40 шақты парақшаны таратты. –  Ұсақ ұрлықпен айналысу, қоғамдық орындарда тазалықты сақтамау, телефон ұрлау, белгіленбеген жерде сауда-саттық жасау, ішімдік ішіп жүру немесе көрсетілмеген жерде темекі шегу «Мүлдем төзбеушілік» қағидасына кіреді. Осындай жағдайға жол бергендер әкімшілік жауапкершілікке тартылады. Жыл басынан бері 4-5 рет қоғамдық орындарда тәртіп орнауын қадағалау мақсатында рейд  жүргіздік. Жолаушылар мен жергілікті тұрғын аталған ережеге бағынып жүрсе қылмыс мен заң бұзушылық деңгейі төмендер еді, – дейді олар. Жолаушыларды айналаны таза ұстауға  үндеген тәртіп сақшылары осы кезді пайдаланып, үлкендерге темір жолда ұл-қыздарының құлақтарына құлаққап тағып жүрмеуін қадағалауды сұранды. Құлаққаптың кесірінен жыл басында бір жас қыздың өлім құшқанын да мысал етті. Одан бөлек, пойыздың терезелерін сындырып, тас лақтырған бұзықтардың ата-анасына айыппұл салынатынын ескерте кетті.  Бір топ тәртіп сақшылары күндізгі сағат 12.45-те Шымкент вокзалына келген Алматы – Маңғышлақ пойызынан түскен жолаушыларға үгіт-насихат жұмыстарын жүргізіп, әр бекетке аялдағанда ұялы телефондары мен  заттарына абай болуды ескертті.

Бекәли АЛТЫН,  Шымкент