Қарияларды құттықтады
Қызылорда жол бөлімшесі есебінде тұратын Күлжахан Созақова мен Сәбилә Файзурахманова әжейлер мамыр айында торқалы тоқсан жасқа толып отыр.
Кезінде тайқұлындай бірге өсіп, қатар жұмыс жасаған бөлімшенің ардагерлер кеңесі төрағасы Қазбек Рахметов бастаған топ қос ардагерді торқалы тойымен құттықтап барды. Сый-сияпатын алып келген бұрынғы әріптестерін қуана қарсы алған қариялар өздерін осы күнге дейін ұмыт қалдырмай іздеп келетін жандар барына шүкіршілік білдірді.
–Біздер аймақ темір жолында еңбек жасап, зейнетке шықтық. Бүгінде темір жолдың қамқорлығына бөленген зейнеткерлер ретінде бөлімше мен Ұлттық компания басшылығына алғысымызды білдіреміз. Қиын кезеңдерде ауыртпалықты арқалаған құдіреті күшті темір жол болашақта да сол өндіріс локомотиві болып қала беретіні анық, – дейді тоқсан жасаған әжейлер.
Қос қарияның иықтарына шапан жауып, бөлімше бастығының құттықтау хатын жеткізгендер көпті көрген көнекөздерге мықты денсаулық, бақуатты өмір тіледі.
Сабырхан СЕЙІЛБЕКҰЛЫ, Қызылорда