Қозғалыс қауіпсіздігі күшейтілген тәртіпте

Новости

10.01.2017, 10:38

Жыл басталғалы ауа- райының күрт бұзылуы, толассыз жауған қар, бұрқасын мен көктайғақ көлік саласының барлық түрлеріне оңайға соқпады. Бірнеше бағыттағы ұшақтар кейінге шегеріліп, тас жолдар жабылды. Міне, осының бәрі ең сенімді көлік түрі – теміржолға қосымша жұмыс көлемін артып, жауапкершілік еселеді. Осыған орай кеше «ҚТЖ» ҰК» АҚ жетекшісі Қанат Алпысбаев қыс мезгілінде теміржол көлігінің жүрісі мен жолаушы тасымалының қалыпты қызмет атқаруын қамтамасыз ету жайында селекторлық жиын өткізді. Өткен жылдың соңғы айында республикалық маңызы бар 156 жолдың жабылып, жаңа жылдың 5 күнінде 50 рет көлік қозғалысы шектелген. Кейбір жол телімдерінде ондаған көлік, жүздеген адам қар тұтқынында қалып, қиындықтарға ұшырады. Алайда, теміржол қозғалысы жұмысын тоқтатқан емес, бірқалыпты жұмыс істеп келеді. Мазасыз маусымда пойыз жолаушылар үшін ең қолжетімді және ең қолайлы көлік түрі болған соң, әрине жолаушы саны күрт өсті. Бұл күндері теміржол қызметінің үздіксіз жұмыс істеуін ұлттық компания басшылығы назарда ұстап отыр. -Барлық қызметтер күшейтілген, айрықша жұмыс тәртібіне көшірілді. Қауіпсіз және үздіксіз тасымалмен қамтамасыз ету бойынша барлық шаралар қолданылып отыр, - деді компания жетекшісі Қ. Алпысбаев. Тасымалдауда жолаушылар вагондарының барлық жиынтығы түгел іске қосылған. Жиналысқа қатысқан «Жолаушылар тасымалы» АҚ президенті Нұрдәулет Қилыбай: «Желтоқсан айының соңғы он күнінде және қаңтардың басында көбінесе ұзақ құрамды жолаушылар пойыздары жұмыс істеді. 44 жолаушылар пойызының құрамына қосымша 500 вагон, кейбір күндері тіпті 7200 орын сыйымдылығы бар 80-ге жуық қосымша вагондар тіркелді»,- деп атап өтті. 4774 орын сыйымдылығы бар 6 бағытта қосымша жолаушы пойыздары қосылды. Сонымен қатар 1484 орны бар Астана-Көкшетау және Астана-Қарағанды бағыттары бойынша жаңа 4 электропойыз жіберілді. Астана-Павлодар бағытындағы электр пойыздардың жүру мерзімділігі артты. Былтыр соңғы айда олар екі реттен емес, бес реттен жүрді. Н. Қилыбайдың айтуынша, желтоқсан айында 2 млн-нан астам жолаушы тасымалданған. Бұл 2015 жылдың көрсеткішіне қарағанда 100 мыңға көп. Пойыздардың кедергісіз қозғалысы үшін тәулік бойы теміржолдарда қар тазалау жұмысы қызу жүруде. Компания басшысы Қанат Алпысбаев қосымша тіркемелерді іске асыру үшін жолаушы вагондарының толық резервін қолдану бойынша тапсырма берді. Экстремалды жағдайда жолаушы тасымалдануына және пойыз қозғалысына қауіп төндірмейтін басқа да шаралар қолдану, ұзын құрамды пойыздарды құруға рұқсат берілді.

Қозғалыс қауіпсіздігі күшейтілген тәртіпте

Читайте также

Газета Қазақстан теміржолшысы, №9 от 06 февраля 2026 года