Қаңтар айында 10 млн тоннадан астам көмір тасымалданды
«Қазақстан теміржолшысы» газетінің тілшісі
Елімізде биыл қыс жайлы болып тұрса да, көмір тасымалы азайған жоқ. Керісінше, ағымдағы жылдың қаңтар айында теміржол арқылы 10,3 млн тоннадан астам көмір тасымалданып, өткен жылдың сәйкес мерзіміне қарағанда 5% өсе түскені байқалады.
Қатты отынның 7,3 млн тоннасы ел ішіне таратылса, 3 млн тоннасы шетел асқан. Яғни, көмір экспорты 23% артқан. Былтыр «ҚТЖ» ҰК» АҚ желісі бойынша 106,2 млн тонна қатты отын тиеліп, бұл көрсеткіш алдыңғы жылдан 3% артық орындалған болатын. Соның ішінде, ел ішіне тиелгені 74,4 млн тонна, жоспар 2% жоғары. Жылу электр орталықтарына 64,6 млн тонна көмір жеткізілсе, халықтың коммуналдық-тұрмыстық қажеттіліктеріне 9,8 млн тоннасы таратылған. Экспортқа шығарылған көмір көлемі 31,8 млн тоннаны құрап, 2020 жыл көрсеткішінен 8% басым түскен. Бұл дегеніміз, шет елдер тарапынан қазақстандық көмірге сұраныстың жылдан-жылға артып келе жатқанын аңдатса керек.
Атап өтерлігі, әлеуметтік маңызға ие бұл жүктер, яғни астық пен көмір тасымалы ұлттық компания басшылығының тұрақты бақылауында. ҚТЖ бастамасымен күн сайын коммуналдық-тұрмыстық көмірдің ірі жөнелтушілері – «Шұбаркөл Көмір» АҚ, «Богатырь Көмір», «Tranco Nura», «ВостокУгольПром» ЖШС-лары және жергілікті атқарушы органдар өкілдерінің қатысуымен кеңестер өткізіліп, көмір тасымалына қатысты мәселелер талқыланып отырады.
Бұдан бөлек, Компанияда көмір тасымалдау бойынша жедел штаб, ал жол бөлімшелерінде – жедел топтар құрылған. Олар жүк жөнелтушілердің өтінімдерінің дер кезінде қамтамасыз етілуін бақылауда ұстайды. Сонымен қатар ЖЭО және ГРЭС қоймаларындағы қатты отын қорының қалдықтарына мониторинг жүргізіп, жүк жөнелтушілерді мәлімделген көлемдер бойынша вагондармен қамтамасыз етуге атсалысады.