Қытай жерінде тұрып қалған контейнерлер елге жеткізіле бастады
«Қазақстан теміржолшысы» газетінің тілшісі
Былтырдан бері Қытай аумағында тұрып қалған 1300-ге жуық контейнер Қазақстанға жеткізіліп, әрі қарай бизнесмендердің келісімшарттық міндеттемелеріне сәйкес басқа елдерге бет алады деп хабарлайды ұлттық кәсіпкерлер палатасы.
Қазіргі кезде Қытай 45 контейнерді Ляньюньган портынан шығару жөніндегі жоспарға қосты, тағы 96 контейнер Қазақстан шекарасына жол тартты. «Subaru Kazakhstan» ЖШС контейнерлері Қытай аумағында 5 ай бойы тұрып қалған. Жақын күндері контейнерлердің алды Қазақстанға жетті. Жүктің кешігуі компания үшін қосымша шығын болды.
Ұлттық палата осы тұрып қалған жүктер туралы деректерді 2021-2022 жылдар аралығында салалық ведомстволар мен «Қазақстан темір жолы» компаниясына хабарлаған.
2022 жылы Үкіметпен бірлесіп, контейнерлерді жөнелтуді жеделдету механизмі әзірленді. Кәсіпкерлер палатасы тұрып қалған контейнерлер туралы деректерді ҚТЖ, Индустрия және инфрақұрылымдық даму министрлігі және Сыртқы істер министрлігіне жіберді. Мемлекеттік органдар Қытай тарапымен қозғалыс жоспарына Қазақстан контейнерлерін енгізу мүмкіндігін нақты пысықтап жатыр.